Policia e Filadelfias ka nisur kërkimet për një burrë të maskuar me një maskë kukulle, i dyshuar për një seri ngacmimesh dhe kërcënimesh pranë Bashkisë së qytetit. Autoritetet thanë se vetëm javën e kaluar rreth gjashtë persona janë ngacmuar ose kërcënuar nga i dyshuari. Policia ka publikuar fotografi dhe një video të tij dhe ka bërë thirrje për ndihmë nga qytetarët për identifikimin dhe gjetjen e personit.
Një nga incidentet më shqetësuese ndodhi më 12 gusht rreth orës 05:30 të mëngjesit, kur një kamera sigurie regjistroi burrin teksa ndiqte një grua që po vraponte në rrugë. Sipas policisë, ai i tha asaj: “A je gati të vdesësh?” Gruaja u pengua dhe u plagos gjatë ngjarjes, ndërsa i dyshuari u largua drejt një stacioni metroje, ku humbi gjurmët.
Shefi i Policisë së Filadelfias, Jason Smith, deklaroi se i dyshuari dyshohet se po filmonte incidentet me celularin e tij, të cilin e mbante me dritën ndezur. Për këtë rast janë ngritur akuza që, sipas policisë, përfshijnë kërcënime terroriste, sulm dhe vepra të tjera penale.
Një dëshmitare tjetër, Luanda Marinho, tregoi për CBS se e kishte takuar burrin e maskuar gjatë një vrapimi të mëngjesit së bashku me një shoqe. Ajo tha se i dyshuari e pyeti disa herë: “A do të garosh me mua? Vë bast se jam më i shpejtë se ti. A do të garosh me mua?” Marinho tha se ato nuk i përgjigjën dhe e përshkroi sjelljen e tij si “shumë e çuditshme”, duke shtuar se pas incidentit ata po mendonin të ndryshonin itinerarin e vrapimit. “Ishte thjesht e çuditshme, si një lojë e çoroditur”, u shpreh ajo.
Policia vijon hetimet dhe ka bërë thirrje që çdo person me informacion mbi identitetin ose vendndodhjen e burrit të kontaktojë autoritetet.
