Zjarri vazhdon të përfshijë pyjet e Malit të Tërbunit, Gojanit dhe Gjegjanit në Bashkinë Pukë, ndërsa forcat në terren po punojnë për izolimin dhe shuarjen e flakëve. Prefektura e Qarkut Shkodër njofton se situata në Malin e Tërbunit paraqitet më e qetë dhe nën kontroll, ndërsa zona Gjegjan–Gojan mbetet më dinamike për shkak të temperaturave të larta dhe erës, që favorizojnë përhapjen e zjarrit.
Në operacionet në terren janë angazhuar si forca tokësore, ashtu dhe kapacitete ajrore. Nga toka po veprojnë dy mjete zjarrfikëse të Bashkive Pukë dhe Fushë-Arrëz, efektivë të Njësive Mbrojtjeje të Pyjeve dhe Shërbimeve të Hidrometeorologjisë (MZSH) Pukë dhe Fushë-Arrëz, si dhe 40 efektivë të Forcave të Armatosura. Në ndërhyrje marrin pjesë edhe punonjës të administratës vendore, banorë dhe vullnetarë të zonës. Ndërhyrja po mbështetet nga ajri me dy helikopterë, të cilët operojnë në sektorët ku terreni i vështirë kufizon veprimet nga toka.
Institucioni i Prefektit bën të ditur se aktualisht nuk raportohet afersi kritike e flakëve me banesat dhe nuk ka rrezik të drejtpërdrejtë për objektet e banimit. Sidoqoftë, zona Gjegjan–Gojan kërkon vëmendje të shtuar për shkak të kushteve meteorologjike që favorizojnë përhapjen e zjarrit. Prefektura vijon monitorimin e pandërprerë të situatës dhe koordinimin e të gjitha strukturave dhe kapaciteteve të angazhuara në terren, me qëllim mbrojtjen e jetës dhe të banesave të qytetarëve deri në normalizimin e situatës.
Operacionet janë të fokusuar në izolimin e fronteve të zjarrit dhe shuarjen e tyre, duke kombinuar ndërhyrjen nga toka dhe nga ajri për të kapërcyer vështirësitë e terrenit. Autoritetet lokale dhe forcat e angazhuara vazhdojnë të mbajnë njoftime dhe të koordinojnë veprimet deri sa situata të jetë plotësisht nën kontroll.
