Janë identifikuar tre personat që humbën jetën dhe dy të rinjtë që mbetën të plagosur në aksidentin tragjik që ndodhi gjatë natës në Manzë të Durrësit. Viktimat janë Kleo Vrioni, 25 vjeç, drejtuesi i automjetit, Sara Brugentelli, 26 vjeçe, dhe Alvi Muhaxhiri, 15 vjeç. Të plagosur janë Rejsi Vrijoni, 25 vjeç, dhe Klevis Dervishi, 16 vjeç; ky i fundit ndodhet në gjendje të rëndë dhe është transportuar drejt Tiranës për ndihmë mjekësore.
Aksidenti u regjistrua rreth orës 02:22, në një rrugë dytësore në Manzë. Sipas njoftimit paraprak të Policisë, automjeti tip BMË, me të cilin udhëtonin pesë persona, ka humbur kontrollin dhe është përplasur me një bordurë betoni. Përplasja rezultoi fatale për tre prej personave që ishin në automjet, ndërsa makina përfundoi në një kanal pranë rrugës.
Në vendngjarje mbërritën shërbimet e emergjencës dhe zjarrfikësit, të cilët ndërhynë për nxjerrjen e personave nga automjeti. Dy të plagosurit u transportuan për ndihmë mjekësore, ndërsa trupat e tre viktimave u dërguan në morg. Pamjet nga vendngjarja tregojnë dëmet e rënda të pësuara nga automjeti, i cili është shkatërruar thuajse plotësisht nga përplasja.
Grupi hetimor ndodhet në vendngjarje dhe po punon për dokumentimin e plotë të rrethanave të aksidentit dhe për përcaktimin e shkaqeve që çuan në humbjen e kontrollit të automjetit. Në përpjekje për zbardhjen e ngjarjes, autoritetet po mbledhin prova dhe po kryejnë veprime procedurale në vendin e ngjarjes.
