Rusia ka paralajmëruar Britaninë e Madhe për “pasoja” pas konfirmimit se dronë të prodhuar në Mbretërinë e Bashkuar janë përdorur nga Ukraina për sulme brenda territorit rus. Moska akuzon Londrën se po përshkallëzon qëllimisht konfliktin dhe se përfshirja britanike po bëhet gjithnjë e më e drejtpërdrejtë. Ambasada ruse në Britani deklaroi se Londra po vepron si “bashkëpunëtore dhe bashkëkryese” e sulmeve ndaj Rusisë dhe paralajmëroi se “Veprimet e Londrës në mënyrë të pashmangshme do të sjellin pasoja për të cilat ajo do të duhet të përgjigjet”. Sipas Moskës, sa më e thellë të jetë përfshirja britanike, aq më i lartë do të jetë “çmimi” që do të paguajë.
Britania e Madhe i është përgjigjur duke përsëritur mbështetjen për Ukrainën. Një zëdhënës i Ministrisë së Mbrojtjes britanike tha se Londra qëndron “krah për krah” me Ukrainën dhe se qeveria britanike është e vendosur t’i kundërvëhet agresionit rus, duke u angazhuar të sigurojë pajisjet që Ukraina u nevojiten për mbrojtje.
Sipas BBC, dronët në fjalë janë prodhuar nga dy kompani britanike dhe janë përdorur kundër objektivave brenda Rusisë, përfshirë infrastrukturë ushtarake dhe industriale, rafineri nafte dhe qendra logjistike të kompanisë Wildberries. Një burim ushtarak tha se dronët britanikë kanë shkaktuar dëme ekonomike që vlerësohen në më shumë se 35 miliardë paund. Zëdhënësja e Ministrisë së Jashtme ruse, Maria Zakharova, deklaroi se dronë që përdorin komponentë dhe konfigurime britanike goditën territorin rus, përfshirë një depo karburanti në rajonin e Rostovit.
Paralajmërimi i Moskës erdhi pas një vale të re sulmesh me dronë. Zyrtarët rusë thanë se rreth 620 dronë u drejtuan gjatë natës drejt rajonit të Moskës, ndërsa mbrojtja ajrore pretendon se shkatërroi më shumë se 180 prej tyre. Një sulm një nate më parë shkaktoi 9 viktima dhe 23 të plagosur, përfshirë një fëmijë, sipas autoriteteve ruse. Po ashtu, Ukraina dyshohet t’i ketë lëshuar rreth 822 dronë drejt Rusisë në një tjetër operacion, 600 prej të cilëve synonin Moskën; autoritetet ruse raportuan se sulmet shkaktuan 7 viktima. Ndërkohë, sulmet ruse ndaj Ukrainës gjatë së njëjtës natë shkaktuan të paktën 7 të vrarë dhe mbi 39 të plagosur. Në prill, Ministria britanike e Mbrojtjes njoftoi një paketë ndihme që përfshin dhjetëra mijëra dronë, përfshirë pajisje sulmi me rreze të gjatë veprimi.
