I dërguari i presidentit amerikan Donald Trump për Lindjen e Mesme, Jared Kushner, ka mbërritur në Izrael për t’u takuar me kryeministrin Benjamin Netanyahu. Vizita ndodh pas bisedimeve të rralla të Kushnerit me përfaqësues të Hamasit, me qëllim diskutimin e zbatimit të një plani paqeje për Gazën të mbështetur nga SHBA-ja. Muajin e kaluar Bordi i Paqes, i drejtuar nga Trump, njoftoi një marrëveshje që parashikon çarmatimin e plotë të Hamasit dhe grupeve të tjera të armatosura në Gaza. Plani 15-pikësh i administratës amerikane përfshin gjithashtu tërheqjen e trupave izraelite dhe rindërtimin e Gazës nën një administratë të re civile palestineze, por Izraeli ka kundërshtuar këtë paketë.
Tetë vende myslimane dënuan refuzimin e planit nga ana e Izraelit. Sipas një zyrtari palestinez, Kushner u takua të dielën në Egjipt me një delegacion të Hamasit të udhëhequr nga lideri i ri i grupit, Khalil al-Hayya. Sipas BBC-së, Hamasi u bëri thirrje ndërmjetësve dhe Bordit të Paqes që të detyrojnë Izraelin të pranojë planin dhe të avancohen hapat e ardhshëm. Megjithatë, Netanyahu përballet me zgjedhje të vështira në tetor dhe me presion nga koalicioni qeverisës, ku disa ministra kërkojnë një qëndrim më të ashpër ndaj Gazës. Edhe pjesë e opinionit publik izraelit shfaqin skepticizëm rreth gatishmërisë së Hamasit për t’u çarmatosur.
Takimi i Kushnerit me al-Hayya konsiderohet kontakti më i lartë mes palëve që nga marrëveshja e armëpushimit në Gaza vitin e kaluar. Në bisedime morën pjesë edhe përfaqësues të Board of Peace, Egjiptit, Katarit dhe Turqisë, si vende ndërmjetësuese në përpjekjet për paqe. Raportimet thonë se diskutimet u përqendruan te çarmatimi i Hamasit, tërheqja e trupave izraelite dhe ndihma humanitare, por deri tash nuk është publikuar ndonjë deklaratë zyrtare mbi rezultatet e takimit.
