Fregata moderne me raketa të drejtuara “Admiral Kasatonov” e Flotës Veriore ruse ka mbërritur në Detin Baltik, vetëm pak ditë pas transferimit të shkatërruesit “Admiral Levchenko”, raporton gazeta gjermane Kieler Nachrichten. Veprimi vjen në një kohë të tensionuar, ndërsa Kremlini ka kërcënuar Evropën me kundërmasa si përgjigje ndaj sanksioneve dhe kontrolleve mbi “flotën në hije” ruse.
“Admiral Kasatonov” i përket klasës “Admiral Gorschkov” dhe, sipas informacionit rus, është në listën e anijeve luftarake më moderne të Moskës. Fregata, e cila hyri në shërbim në vitin 2020, mund të lëshojë raketa “Kalibr” dhe “Zircon”. Kohët e fundit ajo ka kryer misione për sigurimin dhe shoqërimin e kamionëve rusë në Mesdhe dhe në Kanalin Anglez, sipas njoftimeve.
Nga ana tjetër, në fund të korrikut Rusia ka transferuar në Detin Baltik shkatërruesin “Admiral Levchenko” nga Flota Veriore. Anija, me gjatësi mbi 160 metra, është në shërbim që nga viti 1988 dhe ishte projektuar fillimisht për luftë kundër nëndetëseve. “Admiral Levchenko” është e pajisur me sisteme mbrojtjeje ajrore, silura, armë artilerie dhe mundësi për të bartur helikopterë në bord.
Nuk ka pasur deklarata zyrtare nga Moska që të shpjegojnë arsyet specifike të vendimeve për dërgimin dhe transferimin e këtyre anijeve, por media thekson se Rusia ka përdorur intensivisht anije luftarake për muaj të tërë për të shoqëruar tankerë dhe anije mallrash të ashtuquajturës “flotë në hije”, e cila është bërë objekt sanksionesh dhe kontrollesh ndërkombëtare.
Vetëm pak ditë para këtyre manovrave, presidenti Vladimir Putin u ka bërë thirrje shteteve evropiane, duke i paralajmëruar për reagim ndaj veprimeve kundër “flotës në hije”. “Kontrollet e shteteve perëndimore nuk janë gjë tjetër veçse pirateri dhe plaçkitje”, tha ai, dhe paralajmëroi se Rusia do të përgjigjet me “masa përkatëse”.
