Bashkia e qytetit gjerman Monschau, pranë kufirit me Belgjikën, këshilloi banorët të evakuojnë zona pranë kufirit për shkak të një zjarri të madh pyjor që po përparon drejt territorit gjerman. Autoriteti bashkiak njoftoi se fronti i zjarrit ndodhet aktualisht 1.5 kilometra larg kufirit gjerman dhe rreth 1.8 kilometra larg zonës më të afërt të banimit. Monschau ka rreth 12,000 banorë, dhe si masë paraprake zyrtarët lëshuan rekomandimin për evakuim të banorëve që jetojnë në zonat kufitare.
Zjarrfikësit punuan gjatë gjithë natës për të kontrolluar këtë zjarr, të cilin autoritetet belgë e përshkruan si zjarrin pyjor më të madh në historinë e Belgjikës. Zjarri nisi që nga mesdita e së premtes në parkun natyror malor Fagnes, në pjesën perëndimore të Belgjikës, dhe prej atje po përhapet drejt territorit gjerman. Autoritetet lokale bënë me dije se flakët kanë shkatërruar rreth 30,000 hektarë pyje dhe terrene të tjera.
Bashkia e Monschau paralajmëroi gjithashtu se edhe nëse flakët nuk arrijnë të kalojnë kufirin dhe të depërtojnë në territorin gjerman, pritet ndotje e konsiderueshme e ajrit për shkak të tymit që vjen nga zjarri. Për pasojë, autoriteti i qytetit theksoi nevojën për masat e përkohshme të evakuimit në zonat pranë kufirit, duke nxitur banorët që të largohen nga vendbanimet më të prekshme deri sa situata të normalizohet.
Nga ana tjetër, autoritetet belge kanë urdhëruar tashmë evakuimin e qytetit të Kuchelscheid, i cili ndodhet rreth 10 minuta me makinë nga Monschau. Veprimet e autoriteteve, evakuimet dhe përpjekjet e zjarrfikësve vazhdojnë ndërsa zjarri po përhapet dhe po shkakton dëme të mëdha në sipërfaqe pyjore dhe rrethe të gjera natyrore.
