Presidenti amerikan Donald Trump i ka dhënë dritën jeshile përdorimit të miliona dollarëve nga komiteti i tij politik për të mbështetur kandidatët republikanë që konsiderohen më të rrezikuar në zgjedhjet e nëntorit, ndërsa brenda Partisë Republikane rriten shqetësimet për ruajtjen e kontrollit të të dyja dhomave të Kongresit. Sipas burimeve të CNN, ekipi i Trump po diskuton shumën përfundimtare; një burim përmendi rreth 30 milionë dollarë për këstin e parë, por shifra nuk është vendosur ende. Fushata financiare pritet të nisë në javët e ardhshme si përpjekja kryesore e mobilizimit në fazën e fundit të garës.
Nga ana e tij, Trump planifikon të rrisë aktivitetin elektoral me mitingje në distrikte ku republikanët përballen me gara të forta, duke udhëtuar të paktën një herë në javë, por këshilltarët pranojnë se entuziazmi i tij mund të ndryshojë shpejt: “Ne do të shohim sa gjatë do të zgjasë kjo”. Brenda partisë, strategjia po fokusohet kryesisht te mobilizimi i basës “MAGA”, pasi pritet që Trump të ketë pak sukses në bindjen e votuesve të pavarur apo të pavendosur. “Pa dyshim, duhet të sigurohemi që disa prej këtyre votuesve që dalin për Donald Trump… të dalin të votojnë edhe për kandidatët e Kongresit”, tha një këshilltar.
Shqetësimet e brendshme përfshijnë ndikimin e luftës me Iranin dhe rritjen e çmimeve të karburanteve, që sipas këshilltarëve po dëmtjnë shanset republikane duke shqetësuar edhe mbështetësit e politikës së Trump ndaj Iranit. Zëvendëspresidenti JD Vance dhe zëdhënësja në largim e Shtëpisë së Bardhë, Karoline Leavitt, kanë theksuar rëndësinë e uljes së çmimeve të karburanteve; Leavitt tha se objektivat janë po aq të rëndësishme: çmime të ulëta dhe të sigurohet që Irani të mos ketë armë bërthamore. Trump ka deklaruar publikisht gatishmërinë për të zgjatur luftën sa të jetë e nevojshme.
Edhe pse vetë Trump ka thënë “Unë fitova. Nuk po bëj fushatë”, njerëzit pranë tij insistojnë se ai dëshiron fitore republikanëve dhe nuk do të mbështesë gara që i konsideron të humbura. Operacioni politik drejtohet nga një grup këshilltarësh të afërt, në krye me James Blair, me pjesëmarrës si Chris LaCivita, Taylor Budowich, Timothy Saler, Tony Fabrizio dhe Susie Wiles. Karoline Leavitt do të largohet si zëdhënëse fundgusht. Republikanët shpresojnë edhe te rishikimet e hartave të distrikteve dhe një vendim i Gjykatës Supreme për kufizimet e shpenzimeve të komiteteve, por brenda partisë mbetet shqetësimi se koha për të mobilizuar është e shkurtër.
