Pista për transferimin e Emiliano Martinez te Juventus është rihapur papritur. Portieri argjentinas konsiderohej zgjedhja e parë për Zonjën e Vjetër dhe i preferuari i trajnerit Luciano Spalletti, por më parë kjo mundësi u braktis për shkak të kërkesës së Aston Villas, mbi 10 milionë euro, një shifër që drejtuesit e Juventusit e vlerësuan si shumë të lartë për një futbollist që do të mbushë 34 vjeç në shtator. Martinez kishte shprehur dëshirë për një kalim në Serie A, por tratativat nuk ecnin për shkak të diferencës mes kërkesës së klubit anglez dhe ofertave të Juventusit.
Pas heqjes dorë nga Martinez, drejtuesit bardhezi u orientuan drejt alternativave të tjera: emra si Vicario (i Tottenham), Suzuki (i Parmës, përmes PSG), De Gea (i Fiorentinës), Trubin (i Benficas) dhe Chevalier u konsideruan si mundësi për përforcimin e portës. Në orët e fundit, vetëm pak ditë para nisjes së sezonit të ri, situata ndryshoi për shkak të interesit të Aston Villas për Suzuki pas dështimit të kalimit të këtij të fundit te Paris Saint-Germain. Kjo lëvizje e Aston Villas çoi në rifreskimin e interesit për Emiliano Martinez, dhe Juventus raportohet se ka hapur sërish kontakte me klubin anglez për portierin.
Martinez po vazhdon rikuperimin nga një problem në gishtin e njërës dorë. Vetë portieri ka rrëfyer se luajti Botërorin 2026 me një frakturë në një gisht dhe që nuk iu nënshtrua ndërhyrjes kirurgjikale për të mos humbur pjesëmarrjen në kompeticion. Megjithatë, për Juventusin mbetet e komplikuar arritja e marrëveshjes për të marrë portierin nënkampion të botës, për shkak të kërkesave financiare të Aston Villas dhe situatës mjekësore të lojtarit.
