Një zjarr i fuqishëm përfshiu orët e para të mëngjesit të së dielës një hotel në Lungomare të Vlorës, duke lënë të plagosur shtatë persona. Ngjarja ndodhi rreth orës 04:00, ndërsa flakët dyshohet se nisën në katin e parë të godinës, ku funksiononte një bar-restorant, dhe u përhapën shpejt në ambientet përreth. Zjarri më pas u ngjit në katin e dytë, ku ndodheshin dhomat e hotelit, çka vështirësoi evakuimin.
Të shtatë banorët e hotelit tentuan të largohen nga godina; disa u detyruan të hidhen nga ballkonet për t’u shpëtuar flakëve, duke pësuar fraktura, ndërsa të tjerë morën djegie në pjesë të ndryshme të trupit. Një prej vajzave pësoi djegie të shumta në trup. Pas dhënies së ndihmës së parë në Spitalin e Vlorës, të plagosurit u transportuan drejt Tiranës për trajtim më të specializuar, në Spitalin e Traumës dhe në repartin e djegieve.
Sipas mjekëve në Vlorë, gjendja e pjesës më të madhe të të plagosurve është stabilizuar. Edmond Breshanaj, shef i reanimacionit, bëri të ditur se njëra prej vajzave paraqet dëmtime të rënda, me djegie në pjesën më të madhe të trupit. Raportimet mediatike sjellin se të plagosurit janë kryesisht të rinj, rreth moshës 20 deri në 25 vjeç, të cilët kishin disa ditë që pushonin dhe ishin akomoduar në hotel.
Gazetari i Top Channel, Mikel Marsi, njoftoi se dyshohet zjarri të ketë nisur nga një prizë treshe në ambientet e bar-restorantit, ku ishin lidhur dy frigoriferë; mendohet se mbingarkesa elektrike shkaktoi flakët, të cilat më pas u përhapën me shpejtësi në të gjithë lokalin dhe në katin e hotelit. Një prej të rinjve, Luan Saliu nga Lipjani, i cili u detyrua të hidhej nga ballkoni së bashku me bashkëshorten, rrëfeu momentet e panikut dhe përpjekjen për t’u shpëtuar flakëve.
Grupi hetimor vijon punën për të përcaktuar shkaqet e sakta të zjarrit dhe rrethanat e ngjarjes.
