Presidenti i Koresë së Jugut, Lee Jae-myung, ka propozuar zhvillimin e bisedimeve me Korenë e Veriut për t’i dhënë fund zyrtarisht luftës midis dy vendeve, që përfundoi me një armëpushim në vitin 1953, por jo me një traktat. Ai prezantoi idenë e një “sistemi sigurie shumështresor” për të shmangur tensionet përgjatë kufirit de facto, Zonës së Demilitarizuar (DMZ), dhe ofroi të diskutojë mënyra praktike për të frenuar ambiciet bërthamore të Phenianit. Në një ceremoni për Ditën e Çlirimit, Lee u shpreh: “Le të braktisim qëllimet tona për të kërcënuar njëri-tjetrin dhe të fillojmë bisedimet për t’i dhënë fund luftës së gjatë si palë të përfshira drejtpërdrejt”. Ai gjithashtu shprehu shpresën që të dy vendet “do të ulen ballë për ballë për bashkëjetesë paqësore dhe zhvillim të ndërsjellë” dhe se një forum i tillë mund të shërbente për të diskutuar “mënyra efektive për të ndaluar përparimin e aftësive bërthamore të Koresë së Veriut”.
Teksa Koreja e Veriut ka testuar vazhdimisht raketa balistike bërthamore — një fenomen që në Seul dhe Japoninë fqinje shihet si përpjekje për frikësim dhe shfaqje force, sipas BBC — tensionet vazhdojnë edhe pse konflikti ushtarak është kryesisht i ngrirë që nga armëpushimi i 1953. Ka pasur përplasje dhe përshkallëzime përgjatë DMZ-së në dekada, dhe palët akuzohen nga të njëjtat për provokime, përfshirë hedhjen e tullumbaceve me mbeturina dhe materiale propagandistike apo përdorimin e altoparlantëve për transmetime propagandistike.
Lee, i cili mori detyrën vitin e kaluar pasi paraardhësi i tij Yun Suk-yeol u nxor në gjyq për përpjekjen për të shpallur ligj ushtarak, ka kërkuar të rivendosë marrëdhëniet me Korenë e Veriut dhe Kinën, marrëdhënie që ishin përkeqësuar nën udhëheqjen e Yun. Koreja e Veriut shpalli veten fuqi bërthamore në 2022 dhe u zotua të mos dorëzojë kurrë armët e saj bërthamore; nga ato vlerësohet se zotëron dhjetëra. Lee më parë ka thënë se Pheniani po prodhonte 15–20 koka bërthamore në vit dhe ka shprehur mbështetje për një marrëveshje për të ngrirë prodhimin, por deri tani Koreja e Veriut nuk ka reaguar ndaj propozimit të tij dhe më parë i ka hedhur poshtë ofertat për dialog.
