Ish-presidentja Vjosa Osmani është shprehur rreth takimeve që ajo dhe kryetari i LDK-së, Lumir Abdixhiku, zhvilluan me kryetarin e Vetëvendosjes, Albin Kurti, në diskutime për një marrëveshje të mundshme. LDK-ja ka vendosur të qëndrojë në opozitë dhe ka hequr dorë nga çdo kërkesë për postin e kryeparlamentarit, për presidencën apo për pjesëmarrjen në Qeveri, duke bërë të ditur se Vetëvendosje mund të mbajë këto pozita. Partia gjithashtu është shprehur e gatshme të votojë për një President konsensual, me kusht që ai të jetë një person që mbron “Republikën dhe Kushtetutën”.
Osmani, e pyetur në një emision televiziv, tha se një nga dallimet kryesore mes Vetëvendosjes dhe LDK-së para se kjo e fundit të merrte qëndrim për opozitën lidhej me mënyrën se si palët e shihnin rolin e Presidentit të Republikës. Ajo theksoi se për LDK-në Presidenti duhet të ketë përvojë dhe qëndrime politike, jo partiake, dhe ta mbrojë Kushtetutën dhe kompetencat me nder: “Për ne një President i Republikës duhet të ketë një përvojë, duhet të ketë qëndrime politike, jo partiake, ajo është tjetër gjë. Jo të mbajë qëndrime partiake, por të ketë qëndrime politike, të ketë njohuri politike, të ketë mundësi ta mbrojë Kushtetutën, të kryejë kompetencat e veta me nder, ta përfaqësojë vendin jashtë dhe të konsiderohet si një ekuilibër, një lloj balancuesi i pushteteve, siç e kërkon Kushtetuta e Kosovës”.
Osmani shtoi se ky nuk ishte qëndrimi i Kurtit dhe se Vetëvendosje preferonte një President pa qëndrime politike. Ajo tha: “Pala tjetër, pra Vetëvendosja, më shumë e sheh si një figurë totalisht të parëndësishme, që nuk bën asgjë, një figurë simbolike që e shohim ndoshta një herë ose dy në vit. Por, nuk ka qëndrime, kështu e kemi kuptuar ne”. Osmani theksoi se LDK-ja e sheh Presidentin si institucion që shërben si balancues i pushteteve, dhe se Vetëvendosje e sheh Presidentin si një kontrollues, prandaj nuk dëshiron një figurë me përvojë politike, por dikënd jashtë politikës.
Ajo po ashtu u pajtua që tani është koha të diskutohet për emra konkretë dhe bëri të qartë se vota e LDK-së do të lidhet me zgjedhjen e një Presidenti që përmbush kriteret e tyre për një figurë konsensuale.
