Jeff Bezos dhe një grup investitorësh ndërkombëtarë kanë blerë një pjesë të aksioneve të Liverpoolit, por nuk kanë marrë kontrollin e klubit. Fenway Sports Group (FSG), pronari aktual, ka shitur një pjesë minoritare të aksioneve në favor të 1892 Holdings, një konsorcium të drejtuar nga Amit Bhatia, ndërsa FSG mbetet aksionari kryesor dhe mban kontrollin operacional të klubit.
Konsorciumi 1892 Holdings përfshin investime nga Amit Bhatia dhe familja Mittal, K5 Sports — fondi global ku Jeff Bezos është investitori kryesor — si dhe EE Capital, zyra familjare e Elaine dhe Eduardo Saverin. Eduardo Saverin, bashkëthemelues i Facebook, përmendet si një nga investitorët e rinj. Sipas klubi, investimi synon të mbështesë ambiciet e Liverpoolit për rritje afatgjatë duke sjellë eksperiencë nga sektorët e sportit, teknologjisë, biznesit dhe investimeve.
Partnerët e rinj do të bashkëpunojnë me FSG dhe drejtuesit e klubit për të identifikuar mundësi të reja që mund të ndihmojnë në përmbushjen e objektivave të Liverpoolit, si në fushë ashtu edhe jashtë saj. Megjithatë, FSG do të vazhdojë të mbajë shumicën e aksioneve dhe kontrollin e vendimmarrjes.
Mike Gordon, president i FSG, u shpreh i kënaqur me marrëveshjen dhe theksoi se strategjia e klubit ka qenë e orientuar drejt një perspektive afatgjatë, duke marrë vendime në interes të klubit përtej një sezoni të vetëm. Ai shtoi se Amit Bhatia dhe konsorciumi i ri ndajnë të njëjtën filozofi dhe se përvoja e tyre do të jetë një shtesë e rëndësishme për klubin.
Amit Bhatia, në emër të 1892 Holdings, deklaroi se është krenar për investimin në Liverpool Football Club dhe për bashkëpunimin me FSG, duke shprehur respekt e admirim për atë që është arritur në Anfield. Ai e përshkroi mundësinë si një privilegj dhe tha se investimi bazohet në besimin në klub dhe në drejtuesit e tij, duke shprehur gatishmërinë për të mbështetur suksesin e Liverpoolit në vitet në vijim.
Marrëveshja mbetet subjekt i miratimeve rregullatore dhe procedurave të zakonshme për përfundimin e transaksionit.
