Ministria e Mbrojtjes njofton se në 24 orët e fundit janë raportuar 35 vatra zjarri, nga të cilat 8 mbeten aktive. Për menaxhimin e situatës janë angazhuar 533 forca operacionale dhe 39 automjete zjarrfikëse, ndërsa në mbështetje janë angazhuar 186 efektivë të Forcave të Armatosura, 4 helikopterë dhe 2 avionë Air Tractor. Aktualisht në terren vijojnë të operojnë 120 efektivë të FA-së, 2 helikopterë dhe 2 avionë Air Tractor.
Në Tiranë, në zonën e Dajt mbi tunelet e Qafë-Mollës, vazhdon operacioni për shuarjen e zjarrit. Forcat operacionale mbështeten nga 50 efektivë të Forcave të Armatosura dhe 2 helikopterë, dhe raportohet se nuk ka rrezik për zonat e banuara. Në Priskë, Farkë dhe zonat përreth, ndërhyrja e 30 forcave të Ministrisë së Zhvillimit Shpëtimit dhe Mbrojtjes me 6 mjete ka bërë të mundur vendosjen e zjarrit nën kontroll.
Në Krujë, po vazhdon puna në vatrat e Abazes dhe Zidollit. Përpjekjet nga toka, të mbështetura gjatë ditës së djeshme edhe nga ajri, kanë ndihmuar në normalizimin e situatës; në Zidoll po punohet për izolimin dhe fikjen e plotë të zjarrit, pa raportim të rrezikut për zonat e banuara. Një nga operacionet kryesore zhvillohet në Gurë-Lurë, Dibër, ku hapja e korridoreve me mjete dhe forca ka penguar përparimin e zjarrit drejt banesave. Operacioni aty vijon me forcat në terren, të mbështetura sot nga 50 efektivë të FA-së, 2 avionë Air Tractor dhe 1 autobot uji.
Në Qafë Helmes, Bulqizë-Selishtë, operacioni vazhdon me mbështetjen e 20 efektivëve të FA-së; edhe këtu nuk raportohet rrezik për banesat. Në Lezhë, Elbasan dhe Shkodër vijon puna për izolimin dhe shuarjen e vatrave të mbetura në Lufaj, Dardhë dhe pyjet e Tërbunit. Ndërkohë është regjistruar një zhvillim pozitiv në Përmet, Trojë, Qukës dhe Paulesh, ku vatrat janë shuar plotësisht si rezultat i punës së forcave operacionale.
