Temperaturat e larta dhe era kanë nxitur intensifikimin dhe rindezjen e vatrave që më parë ishin vënë nën kontroll. Ministria e Mbrojtjes raportoi se deri në orën 20:00 janë regjistruar 38 vatra zjarri gjatë ditës; aktualisht 18 janë nën vëzhgim, prej të cilave 14 aktive, 2 në monitorim dhe 2 nën kontroll. Për përballimin e situatës funksionon një angazhim i gjerë dhe i koordinuar i strukturave të Mbrojtjes Civile në nivel vendor dhe qendror.
Forcat e Armatosura kanë angazhuar 309 efektivë, 22 mjete, 1 autobot, 3 ambulanca, 9 mjete zjarrfikëse, 3 helikopterë dhe 2 avionë Air Tractor për mbështetje ajrore dhe tokësore. Në Tiranë puna vijon në Dajt dhe në zonën Priskë e Madhe–Gurrë–Farkë–Lundër me përfshirjen e MZSH, ADZM, vullnetarëve dhe mbështetje ajrore nga FA; pavarësisht terrenit dhe përhapjes së mëparshme nuk ka rrezik për zonat e banuara. Në Krujë ndërhyrja operative e FA-së me 1 helikopter ka vendosur zjarret në lagjen Abaze nën kontroll, dhe në Bojë, Krastë e Halil nuk raportohen më vatra aktive.
Angazhimi më i madh vijon në Gurë-Lurë, Dibër, ku janë përqendruar 120 forca bashkiake, 57 efektivë të FA-së, 15 forca policore, 15 vullnetarë dhe 9 punonjës të ADZM-së, të mbështetur nga 2 avionë Air Tractor. Ka arritur të vendoset nën kontroll perimetri pranë banesave dhe është evituar rreziku për djegien e tyre, ndërkohë që puna vazhdon në dy drejtimet e tjera; në Qafën e Helmes operojnë MZSH, forca bashkiake dhe njësia administrative Selishtë.
Në Përmet operohet në Nëmerçkë dhe Dhëmbel në terren të vështirë, por pa rrezik për zonat e banuara. Në Moravë, Devoll, ndërhyrjet e MZSH kanë bërë që situata të vijë nën kontroll. Në Trojë, Mirditë i janë bashkuar 30 efektivë të FA-së së bashku me MZSH, forcat bashkiake, policinë dhe vullnetarët. Në Shkodër vijon puna në Rrencë dhe Goraj-Budishtë, ku kjo e fundit po shkon drejt izolimit dhe nuk paraqet rrezik për banesat; vatra në Kryezi është nën kontroll. Në Elbasan operacionet vazhdojnë në Dardhë, Lugaxhi dhe Shalës; në Lugaxhi janë angazhuar MZSH, pyjorja, ASHP, forca bashkiake dhe 30 vullnetarë, pa rrezik për zonat e banuara dhe me mbështetje nga FA. Në Finiq vatrat në Dhivër dhe Rumanxë janë shuar plotësisht, ndërsa ajo në Dhrovjan është nën kontroll, pas ndërhyrjes së kombinuar tokë-ajër.
