Ferran Torres do të vijojë karrierën në Francë pasi Barcelona ka arritur marrëveshjen me Paris Saint Germain për transferimin e sulmuesit valencian drejt klubit kampion të Evropës. Sipas asaj që publikohet në median spanjolle, transferimi do të realizohet për një vlerë rreth 50 milionë euro, shifër kjo fikse dhe pa bonuse. Sulmuesi, kampion bote, pritet shumë shpejt t’i bashkohet Paris Saint Germainit, me të cilin kishte arritur një akord për një kontratë pesëvjeçare.
Në ditët e fundit Ferran Torres, përmes agjentit të tij, i kërkoi Barcelonës që të mos ishte i pranishëm në seancën stërvitore të mërkurën, ditë kur do të duhej të vihej nën urdhrat e trajnerit Flick. Me arritjen e marrëveshjes mes klubeve, tani mbetet përgatitja e dokumenteve kontraktuale, një proces që kanë nisur të dy klubet, Barcelona dhe Paris Saint Germain. Gjithashtu, para zyrtarizimit të transferimit mungon kryerja e vizitave mjekësore nga ana e Ferran Torres, të cilat do të jenë një hap i domosdoshëm për finalizimin e operacionit.
Operacioni i transferimit vlerësohet rreth 50 milionë euro, një shifër e konsideruar e pranueshme duke marrë parasysh se futbollisti ndodhej në vitin e fundit të kontratës me Barcelonën. Kur Barcelona bleu Ferran Torres në vitin 2022, pagoi 55 milionë euro si shifër fikse dhe shtoi 10 milionë në formën e bonuseve. Për më tepër, një klauzolë në marrëveshjen e blerjes parashikonte një pagesë shtesë prej 8 milionë eurosh ndaj Manchester City në rast të rinovimit të kontratës së lojtarit. Kjo do të thotë se me shumën që do të marrë nga PSG dhe pa rinovim të kontratës, Barcelona rikuperon thuajse të gjithë shifrën që kishte shpenzuar për blerjen e Ferran Torres para katër vjetësh. Top Channel.
