Ish-boksieri portorikan Prichard Colon ka ndërruar jetë në moshën 33-vjeçare, 11 vite pas një dëmtimi të rëndë në tru që e la në koma pas një ndeshjeje të diskutueshme në ring. Lajmin e bëri të ditur babai i tij, Richard Colon, përmes një postimi në rrjetet sociale: “Me keqardhje ju njoftoj për ndarjen nga jeta të djalit tim Prichard nga kjo botë. Tani ai është në një botë më të mirë”, duke falënderuar të gjithë ata që mbështetën familjen me dashuri dhe lutje gjatë këtyre viteve.
Para përplasjes fatale, Colon ishte një nga talentet më premtues të boksit profesionist, me një rekord prej 16 fitoreve dhe asnjë humbjeje, 13 prej të cilave me nokaut. Në vitin 2015 ai u përball me amerikanin Terrel Williams në një duel që do të ndryshonte jetën e tij. Gjatë asaj ndeshjeje, Colon u godit disa herë në pjesën e pasme të kokës — goditje të paligjshme në boks — dhe i kërkoi arbitrit të ndërhynte, por përballja vazhdoi. Në raundin e nëntë ai u rrëzua. Pas një konfuzioni, ku ekipi i tij mendoi se ndeshja kishte përfunduar dhe i hoqi dorezat, arbitrat e shpallën Colon të skualifikuar.
Gjendja e tij u përkeqësua menjëherë pas përballjes; ai u dërgua në dhomën e zhveshjes, ku filloi të vjellë dhe më pas humbi ndjenjat. Në spital mjekët konstatuan një hematomë subdurale, një grumbullim gjaku në tru që shkakton presion mbi trurin. Colon iu nënshtrua një operacioni urgjent për të reduktuar ënjtjen e trurit dhe për të hequr hematomën. Pas ndërhyrjes, ai ra në koma për 221 ditë. Kur u zgjua nga koma, mbeti në gjendje vegjetative dhe nuk ishte në gjendje të komunikonte normalisht; për të komunikuar i duhej ndihma e një kompjuteri.
Gjatë gjithë këtyre viteve kujdesi për Colonin u mor nga familja e tij, e cila qëndroi pranë tij deri në momentet e fundit. Para karrierës profesioniste, ai kishte spikatur edhe në boksin amator, duke fituar tituj kombëtarë në kategoritë 141 dhe 152 paund. Në 2012 tentoi të siguronte vend në Lojërat Olimpike të Londrës përmes turneut paraolimpik në Brazil, por u eliminua në raundin e parë dhe të njëjtin vit kaloi në profesionist, debutoi në shkurt 2013 dhe regjistroi 16 fitore radhazi në pak më shumë se dy vite. Humbja ndaj Terrel Williams mbeti e vetmja disfatë në karrierën e tij profesionale.
