Kryeministri Edi Rama ka vijuar debatin rreth renditjes së Shqipërisë në krye të klasifikimit ndërkombëtar për sigurinë kibernetike, duke reaguar sërish në rrjetet sociale pas komenteve që vunë në dyshim rezultatet e indeksit. Në reagimin e tij Rama iu referua një artikulli të Euronews që pasqyron pozicionin e Shqipërisë dhe përmirësimet e ndërmarra në sektorin e sigurisë kibernetike pas sulmit masiv të vitit 2022.
Sipas kryeministrit, Shqipëria renditet e para në botë me 98.33 pikë nga 100, duke lënë pas vende me kapacitete të mëdha teknologjike si Gjermania, Mbretëria e Bashkuar dhe Shtetet e Bashkuara. Ai lidh këtë rezultat me transformimin e sistemit shqiptar të sigurisë kibernetike pas sulmit të vitit 2022, për të cilin autoritetet shqiptare kanë fajësuar Iranin.
Rama thotë se pas sulmit janë ndërmarrë një sërë masash: rindërtim i kuadrit ligjor, centralizim i mbrojtjes kibernetike, forcim i kapaciteteve institucionale dhe zgjerim i bashkëpunimit me partnerë ndërkombëtarë, përfshirë Bashkimin Europian, Shtetet e Bashkuara dhe kompanitë më të mëdha të teknologjisë. Në postimin e tij ai shkruan se vendi arriti pikë maksimale për politikat kibernetike, bashkëpunimin ndërkombëtar, arsimin dhe kërkimin, mbrojtjen e infrastrukturës kritike, analizën e kërcënimeve, mbrojtjen e të dhënave, reagimin ndaj incidenteve, menaxhimin e krizave dhe luftën kundër krimit kibernetik.
Kryeministri thekson se sulmi i vitit 2022 mund të kishte gjunjëzuar vendin, por sipas tij ai u shndërrua në një shtysë për transformim. Ai përmend gjithashtu se Shqipëria digjitale ofron online 95% të shërbimeve publike dhe se kjo mburojë kibernetike është po aq jetike sa çdo infrastrukturë tjetër strategjike e vendit. Në postim Rama paraqet tranzicionin nga një objektiv i një sulmi shtetëror kibernetik në vend që tani kryeson renditjen globale për sigurinë kibernetike.
Në postimin e shpërndarë ai citon artikullin e Euronews dhe e paraqet lajmin si diçka që, sipas tij, “i mërziti” kritikat lokale. Top Channel raporton reagimin dhe përmbajtjen e postimit të kryeministrit.
