Ashtu siç raportoi të dielën gazetarja Anila Hoxha, pas mbledhjes së Komisionit të Disiplinës dhe një rishikimi të dytë të çështjes, janë pezulluar nga detyra tetë efektivë të Policisë së Burgut Fier. Pezullimi do të jetë në fuqi deri në përfundimin e hetimeve ndaj tyre. Vendimi u mor pas shqyrtimit të situatës nga Komisioni i Disiplinës, ndërsa hetimet për ngjarjen vijojnë.
Efektivët do të qëndrojnë jashtë detyrës deri në përfundimin e procesit hetimor dhe sqarimin e përgjegjësive të mundshme. Pezullimi lidhet me ngjarjen e të shtunës dhe rezulton se ata ishin të planifikuar në dy sektorët e burgut. Në konflikt u përfshinë Denis Brajovic (Bajri) dhe Jurgen Zotaj, të cilët mbetën të dy të plagosur.
Gazetarja raporton se të pezulluarit janë:
– K/Inspektor G.B. – Përgjegjës turni në regjimin e brendshëm.
– Inspektor Sh.H. – Përgjegjës turni në regjimin e brendshëm.
– Inspektor A.A. – Punonjës i rolit bazë.
– Inspektor D.GJ. – Punonjës i rolit bazë.
– Inspektor A.H. – Punonjës i rolit bazë.
– Inspektor P.K. – Punonjës i rolit bazë.
– Inspektor S.Ç. – Punonjës i rolit bazë.
– Inspektor A.S. – Punonjës i rolit bazë.
Sakaq, Shërbimi i Kontrollit të Brendshëm të Burgjeve po verifikon edhe një informacion të referuar sipas të cilit, pas sherrit, disa makina të blinduara qëndruan jashtë perimetrit të burgut dhe jashtë spitalit. Hetimet e brendshme dhe procedurat disiplinore pritet të sqarojnë rrethanat e ngjarjes dhe përgjegjësitë e mundshme të efektivëve të pezulluar.
Lajmi është publikuar në Top Channel dhe u raportua nga gazetarja Anila Hoxha.
