Shoqatat e transportit publik kërkojnë disbursim të menjëhershëm të kompensimit të karburantit për muajt mars, prill dhe maj 2026, duke paralajmëruar se mungesa e likuiditetit mund t’i detyrojë të reduktojnë numrin e autobusëve dhe frekuencën e shërbimit. Shoqata Kombëtare e Transportit Qytetas dhe Shoqata e Transportit Urban dhe Interurban i kanë dërguar një kërkesë urgjente Kryeministrisë, Bashkisë së Tiranës dhe ministrive përgjegjëse, me shkresë të datës 11 gusht.
Në dokumentet e paraqitura, shoqatat kërkojnë disbursimin e kompensimit prej 50 lekësh për çdo litër karburant të konsumuar gjatë muajve mars, prill dhe maj 2026, të parashikuar me vendimin e Këshillit të Ministrave të datës 13 maj. Sipas tyre, operatorët kanë dorëzuar dokumentacionin e kërkuar dhe kanë përmbushur procedurat për përfitimin e këtij kompensimi, por pagesat nuk janë kryer ende.
Shoqatat theksojnë se vonesa në pagesa po shkakton vështirësi financiare për operatorët, të cilët deri tani kanë vazhduar të mbulojnë kostot e shërbimit me fondet e tyre. Për këtë arsye, ato kërkojnë informacion zyrtar mbi fazën ku ndodhet procesi i disbursimit, arsyet e vonesës dhe përcaktimin e një afati konkret për kryerjen e pagesave.
Përveç kompensimit për periudhën mars–maj, operatorët kërkojnë që skema e mbështetjes të vijojë edhe pas muajit maj, duke argumentuar se çmimet e karburantit mbeten të larta. Në kërkesën e tyre paralajmërohet se nëse institucionet përgjegjëse nuk reagojnë në kohë, operatorët do të detyrohen të rishikojnë numrin e mjeteve në qarkullim dhe kapacitetet e shërbimit.
Shoqatat nënvizojnë se një reduktim i tillë do të ndikonte drejtpërdrejt në frekuencën e autobusëve dhe në cilësinë e shërbimit për qytetarët. Në dokumentacionin e depozituar, ata kërkojnë përgjigje konkrete dhe veprime për të siguruar likuiditetin e nevojshëm për funksionimin normal të transportit publik.
