Në Krujë vazhdojnë të jenë aktive disa vatra zjarri, të favorshme nga era, ndërsa terreni i vështirë po e komplikon ndërhyrjen nga toka. Një vatër u riaktivizua pasditen e sotme në lagjen Abaze, vendin ku dy ditë më parë nisi zjarri që përfshiu zonat përreth dhe rrezikoi qytetin e Krujës. Në atë zonë janë të pranishëm forca të shumta zjarrfikëse, efektivë të Forcave të Armatosura dhe banorë, që po punojnë për kufizimin dhe shuarjen e flakëve.
Edhe vatra në fshatin Halil mbetet aktive; ndërhyrjet po kryhen si nga ajri, ashtu edhe nga toka. Helikopterët e Forcave Ajrore vazhdojnë operacionet e shuarjes, ndërkohë që terreni i thyer po e vështirëson ndjeshëm punën e forcave në tokë dhe kufizimin e përhapjes së zjarreve.
Sipas Prefekturës së Durrësit, vatra në Krastë po vihet nën kontroll, por forcat në terren janë të ndara në dy grupe për të mbuluar zonat kritike dhe për të menaxhuar punën e shuarjes. Në Krastë, në zonën e Zidollit, gjatë ditës janë angazhuar rreth 50 efektivë të Forcave të Armatosura, së bashku me zjarrfikësit dhe strukturat e emergjencave civile, për të shuar zjarrin që natën e kaluar ishte vënë përkohësisht nën kontroll.
Forcat në terren vijojnë ndërhyrjen në vatrat aktive me qëllim izolimin e plotë të zjarreve dhe shmangien e rrezikut për zonat e banuara. Përpjekjet përfshijnë koordinim midis zjarrfikësve, forcave të armatosura dhe strukturave civile të emergjencave, si dhe përdorimin e avionëve/helikopterëve për goditje të shpejta nga ajri aty ku terreni e lejon. Dëmet e konstatuara deri tani përfshijnë humbje të konsiderueshme në ullishte dhe në pemët frutore, ndërsa puna për shuarje dhe vlerësim të mëtejshëm të dëmeve vazhdon.
