Mbas incidentit ku mbetën dy të dëmtuar në burgun e Fierit, Drejtoria e Përgjithshme e Burgjeve largoi nga ky institucion dy të dënuar. Sipas burimeve të Top Channel, njëri prej tyre, Aldo Gjini, u transferua në burgun e sigurisë së lartë në Burrel, ndërsa Jurgen Zotaj u dërgua nga spitali i Fierit në Qendrën Spitalore në Burgje në Tiranë. Në burgun e Fierit është mbajtur vetëm Denis Brajovic, i njohur edhe si Bajri.
Policia e Fierit, së bashku me prokurorinë, po kryejnë hetime për të përcaktuar shkaqet e përleshjes mes të burgosurve që përfundoi me plagosjen e Brajovic dhe Zotaj. Janë marrë në pyetje gjashtë punonjës të burgut që ishin në detyrë gjatë incidentit; nga ta pritet që katër të pezullohen gjatë javës së ardhshme si të dyshuar për neglizhencë të rregullave të sigurisë.
Pamjet nga kamerat e sigurisë tregojnë Jurgen Zotaj dhe Aldo Gjini të lëvizin nga një sektor në tjetrin drejt sektorit ku ishte Brajovic, pasi këtij të fundit i kishte komunikuar nëse do ta priste një vizitë për kafe. Më pas tre të burgosurit takohen me njëri‑tjetrin duke u përqafuar dhe zhvendosen në një ambient tjetër ku nuk ka kamera.
Sipas dëshmisë së Brajovic, ai u sulmua me një send të improvizuar, një armë e ftohtë. Brajovic deklaron se ia rrëmbeu armën Jurgenit dhe me të iu kundërpërgjigj. Ai thotë se nuk kishte asnjë konflikt paraprak dhe se kishte pranuar vizitën për kafe sepse njihte dhe kishte miqësi me personat, përfshi Aldo Gjinin, që e kishte garantuar.
Hetimet vazhdojnë për të përcaktuar nëse shkak i incidentit ishte një mosmarrëveshje e rastësishme në burg apo nëse bëhet fjalë për një ngjarje të qëllimshme e porositur. Top Channel.
