Një ditë pas natës së tmerrit, Kruja po merr frymë më qetësisht. Zjarret që rrezikuan qytetin gjatë natës janë vënë nën kontroll, ndërsa sot fokusi është te shuarja nga ajri e vatrave të mbetura dhe rikthimi i normalitetit. Flakët nisën në lagjen Abaze dhe, të favorizuara nga era dhe terreni i vështirë, përhapën shpejt përgjatë faqes së malit, duke u afruar gjatë mbrëmjes dhe në orët e natës pranë zonave të banuara.
Për arsye sigurie u evakuuan banorët e Abazes, Barabit, Llubanit e Varoshit. Mes të evakuuarve ishin edhe pacientët e Spitalit të Krujës, të cilët gjatë natës u transferuan në Qendrën Shëndetësore të Fushë-Krujës; sot ata u kthyen në spital, pasi situata u qetësua. Në terren u angazhuan më shumë se 200 zjarrfikës dhe mbi 200 efektivë të Forcave të Armatosura, të cilët punuan pa ndërprerje gjatë gjithë natës, me ndihmën edhe të banorëve që kontribuan në mbrojtjen e banesave të tyre.
Pas orës 06:00 zjarri u deklarua nën kontroll të plotë. Bilanci fatmirësisht nuk regjistron viktima apo shtëpi të shkrumbuara. Dëmet materiale janë të kufizuara: një magazinë biznesi u shkatërrua, zjarri përfshiu ndërtesën e vjetër të ish-zdrukthtarisë dhe një magazinë të Ujësjellësit të Krujës. Flakët dëmtuan gjithashtu një linjë 6 kilovolt të tensionit të mesëm, ndërsa ekipet po punojnë për rikthimin e furnizimit elektrik.
Forcat në terren vijojnë monitorimin e zonës dhe intervenimin në malin mbi Krujë, me qëllim shuarjen e plotë të çdo vatre dhe parandalimin e riaktivizimit të zjarrit. Operacionet përfshijnë edhe përdorimin e mjeteve ajrore për fikjen e pikave të nxehta, ndërsa banorët dhe autoritetet punojnë drejt rikthimit të plotë të normalitetit në qytet.
