Një zjarr masiv ka përfshirë sipërfaqe të mëdha toke në fshatin Koilac të Mallakastrës, duke rrezikuar banesat dhe banorët e zonës. Për shkak të përhapjes së shpejtë të flakëve, shërbimet e Policisë ndërhynë menjëherë dhe evakuuan disa familje nga fshati.
Në terren janë angazhuar Komisariati i Policisë Mallakastër, strukturat e Drejtorisë Vendore të Policisë Fier, shërbimet zjarrfikëse, Forcat Kombëtare të Sigurisë, strukturat e emergjencave civile dhe strukturat e tjera përgjegjëse. Erea e fortë po ndihmon përhapjen e flakëve drejt zonave të banuara, dhe deri tani zjarri ka shkaktuar dëme të konsiderueshme në bimësi.
Policia vazhdon të jetë e angazhuar në terren, duke garantuar sigurinë e banorëve dhe duke bashkëpunuar me të gjitha strukturat për izolimin dhe shuarjen e zjarrit. Përhapja e flakëve po drejtohet edhe në drejtim të fshatrave Hekal, Panahor, Riban dhe Ngraçan, ku po merren masa për parandalimin e dëmtimeve në banesa dhe infrastruktura.
Një grup hetimor, nën drejtimin e Prokurorisë, po punon për përcaktimin e shkakut të zjarrit, dokumentimin e plotë të rrethanave dhe identifikimin e autorit nëse rezulton se zjarri ka qenë i qëllimshëm ose i shkaktuar nga veprime të kundërligjshme. Hetimi synon zbardhjen e origjinës së incidentit dhe përgjegjësive lidhur me përhapjen e tij.
Drejtoria Vendore e Policisë Fier apelon te qytetarët të mos ndezin zjarre për djegien e mbetjeve bimore apo për çdo qëllim tjetër, pasi përhapja e pakontrolluar e flakëve mund të sjellë pasoja të rënda për jetën, pronën dhe mjedisin. Policia fton gjithashtu qytetarët të denoncojnë çdo rast zjarrvënieje apo paligjshmërie tjetër në numrin 112, duke garantuar reagim të menjëhershëm, të paanshëm dhe ruajtjen e anonimatit.
