Prokuroria e Tiranës ka përfunduar hetimet dhe ka dërguar në gjyq një shtetas nigerian, me inicialet L.O., të akuzuar për “Mashtrim kompjuterik” sipas nenit 143/b/1 të Kodit Penal, për disa skema mashtrimi online që synonin qytetarë shqiptarë përmes komunikimeve në rrjete sociale dhe pako të rreme. Hetimi nisi pas kallëzimit të një shtetaseje, me inicialet M.E., e cila punonte në një call center dhe u bë viktimë e një skeme mashtrimi përmes rrjeteve sociale. Sipas Prokurorisë, i pandehuri e kontaktoi viktimën fillimisht përmes Instagramit dhe më pas në WhatsApp, duke u prezantuar si shtetas italian, megjithëse nuk zotëronte gjuhën italiane.
Pas krijimit të komunikimit, mashtruesi i kërkoi viktimës të kryente një pagesë me pretendimin se nuk mund ta bënte vetë, për të dërguar një pako-surprizë. Pas pagesës së parë, ai kërkoi edhe të dhëna të tjera bankare dhe pagesa shtesë, duke i premtuar përsëri se pakoja do t’i mbërrinte. Megjithatë pakoja nuk arriti kurrë dhe kërkesat për para vazhduan. Prokuroria flet për përdorim të llogarive bankare ku ishin kryer pagesat, konkretisht llogarinë PostePay Evolution, e cila shërbeu si destinacion i transfertave.
Përmes veprimeve hetimore dhe shkëmbimit të informacionit me autoritetet italiane përmes letërporosive, u identifikua personi që kishte në përdorim llogarinë e përmendur. Autoritetet zbuluan se posedues i llogarisë ishte shtetasi nigerian L.O., me banim në Itali, i cili tashmë është dërguar për t’u gjykuar në gjykatat shqiptare. Prokuroria e Tiranës njoftoi fillimin e procedimit gjyqësor ndaj tij dhe paralajmëroi qytetarët për rritjen e rasteve të mashtrimeve online.
Në njoftim theksohet apeli që qytetarët të mos ndajnë të dhëna personale, kredenciale bankare apo informacione të ndjeshme me persona të panjohur në internet, duke i bërë thirrje për kujdes në komunikimet online.
