Qeveria Rama 4 nuk do të ketë pushime vere deri në fund të gushtit, ndërsa Kryeministri Edi Rama do të vazhdojë traditën e takimeve informale të ekzekutivit, të njohura si “retreat”, para sesionit të ri parlamentar. Burime nga qeveria i konfirmuan gazetarit të Top Channel, Muhamed Veliu, se më 24 dhe 25 gusht pritet që të gjithë ministrat të raportojnë për prioritetet e secilës ministri për muajt në vazhdim. Të njëjtat burime thanë se ky retreat parashikohet të mbahet në qytetin e Pogradecit.
Brenda Partisë Socialiste nuk përjashtohet mundësia e mbledhjes së Asamblesë Kombëtare Socialiste në fillim të shtatorit, përpara rinisjes së punës së Parlamentit, që ka seancën e radhës më 7 shtator. Në rast mbajtjeje të asamblesë, momenti mund të shfrytëzohet nga kryesocialisti Edi Rama për të bërë ndryshime në kabinetin qeverisës. Në qarqet e qeverisë prej disa javësh qarkullojnë zëra për një rifreskim drejtimi të mundshëm në të paktën gjashtë ministri, por vendimi mbetet në dorë të Ramës, i cili elementin e surprizës e ka cilësuar si pjesë të stilit të tij.
Fillimi i shtatorit pritet të sjellë zhvillime të shumta si për Qeverinë ashtu edhe për Partinë Socialiste, për shkak të kërkesës së shtuar të llogaridhënies që Rama i ka vënë zyrtarëve të tij. Kjo llogaridhënie kulmon me dokumentin “Besa”, të prezantuar si qasje dhe metodë e re e punës për mandatet e katërt të qeverisjes. Nëse Rama vendos të mbajë mbledhjen e Asamblesë së PS, në rendin e ditës do të duhet të përfshihet edhe mocioni për hapjen e dialogut kombëtar mbi marrëveshje të reja për Shqipërinë, të depozituar në Partinë Socialiste nga deputetja Elisa Spiropali.
Lajmi konfirmohet nga burimet qeveritare dhe përmendet nga Top Channel.
