Pozitat e presidentit të FIFA-s, Gianni Infantino, po sfidohen gjithnjë e më fort, ndonëse ai ka përkrahjen e këshillit administrativ të organisë. Në këtë kontestim ndaj drejtuesit të futbollit botëror është përfshirë tani edhe Konfederata Amerikanolatine e Futbollit, CONMEBOL, e cila i bashkohet UEFA-s në reagimin kritik.
CONMEBOL bën apel për ruajtjen e unitetit brenda familjes së futbollit dhe për veprim me përgjegjësi institucionale, duke nënvizuar nevojën për forcimin e dialogut dhe respektin e plotë të mekanizmave të qeverisjes. Konfederata përshëndet vendimin e FIFA-s për t’u tërhequr nga propozimi FFE, por shpreh njëkohësisht shqetësim për atë që e quan veprime të njëanshme dhe të ndërmarra pa dialog apo pa përdorimin e mekanizmave institucionale të përcaktuar.
Në një qëndrim unanim, CONMEBOL thekson se ata që mbanin drejtimin e organizatave duhet t’i japin gjithnjë përparësi dialogut, respektimit të rregullave dhe shkëmbimit konstruktiv. Sipas deklaratës, kur këto principe injorohen, pasojat godasin futbollin dhe të gjithë aktorët e tij. Futbolli, vijon CONMEBOL, i përket të gjithëve dhe e ardhmja e tij mund të ndërtohet vetëm përmes respektit të institucioneve, të qeverisjes dhe të procedurave demokratike që përfaqësojnë 211 federatat anëtare të FIFA-s.
CONMEBOL rikujton afatin e fundit për paraqitjen e kandidaturave për presidencën e FIFA-s, të datës 18 nëntor 2026, dhe sqarojnë se më pas Kongresi i FIFA-s, përmes votimit të 211 federatave, do të zgjedhë kreun që do të ketë përgjegjësinë e drejtimit për mandatin e ardhshëm, përfshirë ndër të tjera organizimin e Kupës së Botës 2030. Në përmbyllje, Konfederata deklaron se nuk do të mbështesë asnjë veprim apo procedurë që injoron ose devijon nga këto mekanizma institucionalë.
