Futbolli shqiptar dhe komuniteti sportiv i Librazhdit kanë humbur Besnik Çotën, një prej figurave më të dalluara të KF Sopotit. Çota, ish-kapiten dhe ish-trajner i ekipit nga Librazhdi, ndërroi jetë në moshën 56-vjeçare në një spital në Tiranë, pas një beteje të gjatë me një sëmundje të rëndë. Ai vuante prej vitesh nga probleme të rënda shëndetësore dhe i ishte nënshtruar edhe trajtimit me dializë.
Lajmi për ndarjen e tij nga jeta ka prekur thellë familjen, miqtë, ish-bashkëlojtarët dhe tifozët, si dhe të gjithë komunitetin sportiv të qytetit. Përveç kontributit në fushë, Çota do të mbahet mend si një njeri i ndershëm, i përkushtuar dhe i respektuar nga ata që e kanë njohur.
Gjatë karrierës së tij si futbollist, Besnik Çota konsiderohej një nga më të mirët që kanë veshur fanellën e Sopotit. Në vitet ’90 ai spikati si dirigjent i mesfushës, duke u dalluar për cilësitë teknike, vizionin e lojës dhe aftësitë drejtuese. Për 12 vite mbajti shiritin e kapitenit, duke u bërë simbol i klubit gjatë periudhës kur Sopoti garonte edhe në elitën e futbollit shqiptar.
Pas përfundimit të karrierës si lojtar, ai vazhdoi të kontribuonte për klubin si trajner. Fillimisht u angazhua me ekipet e moshave, ku ndihmoi në formimin e brezave të rinj të futbollistëve, dhe më pas mori drejtimin e skuadrës së parë. Roli i tij si trajner konsistoi në vazhdimësinë e lidhjes me klubin e zemrës dhe në përpjekjet për të mbajtur dhe zhvilluar komunitetin sportiv lokal.
KF Sopoti i dha lamtumirën Besnik Çotës me një mesazh prekës, duke e përshkruar atë si një njeri që ia kushtoi jetën klubit dhe futbollit të Librazhdit. Në reagimin zyrtar të klubit thuhej: “Sopoti dhe qyteti i Librazhdit do të jenë gjithmonë borxhlinj për gjithçka që i dhe futbollit. Do të mbetesh përgjithmonë në zemrat tona”. Top Channel njofton për vdekjen e tij.
