Vala e të nxehtit që po përjeton Evropa ka ndikim të drejtpërdrejtë në shëndetin mendor dhe fizik të njerëzve. Gjatë të nxehtit ekstrem këtë verë, kur u regjistruan temperatura rekord në Evropën Perëndimore, një anketë në Britaninë e Madhe tregoi se 65 përqind e të rriturve raportuan se qëndronin zgjuar për tre ose më shumë orë në natë në vend që të flinin. Çrregullimet e gjumit konsiderohen një pasojë e pashmangshme e verave më të gjata dhe më të nxehta që lidhen me ndryshimet klimatike.
Evropa po ngrohet më shpejt se mesatarja botërore — me temperatura që rriten më shumë se dy herë më shpejt — dhe kjo e bën kontinentin një nga vatërat kryesore të fenomenit të pagjumësisë. Sipas shkencëtarëve ndërkombëtarë që studiojnë ndikimin e klimës në ekstremet meteorologjike, temperatura jashtëzakonisht të larta gjatë natës janë sot njëqind herë më të mundshme për shkak të ndryshimeve klimatike. Humbja e gjumit si pasojë e nxehtësisë është vënë re vetëm kohët e fundit si një tregues i rëndësishëm i ndikimit klimatik mbi shëndetin fizik dhe mendor.
Për të analizuar ndikimin e temperaturave në rritje mbi gjumin, një ekip ndërkombëtar studiuesish mblodhi të dhëna mbi 165 milionë netë gjumi nga rreth 318 mijë përdorues të pajisjeve monitoruese të gjumit, të veshura në trup ose të vendosura nën dyshek. Studimi lidh ngërçet e gjumit jo vetëm me dëmtime të përqendrimit dhe disponimit, por edhe me rreziqe të shtuar shëndetësore afatgjata.
Çrregullimet kronike të gjumit përmenden si faktor që mund të rrisë rrezikun e sëmundjeve të ndryshme: diabetit, depresionit, sëmundjeve të zemrës dhe obezitetit. Ndikimi i nxehtësisë në cilësinë e gjumit shihet kështu si një dimension i ri dhe tërësor i pasojave të ndryshimeve klimatike mbi mirëqenien fizike dhe mendore të popullatës.
