Katër vite më parë Grida Duma dorëzoi mandatin për të marrë detyrën e moderatores dhe autores së emisionit politik në Top Channel, “Top Story”. Në podcast-in “UET Cast” të Universitetit Europian të Tiranës, në një bisedë me Prof. Dr. Belina Budini, Duma rrëfeu arsyet dhe momentin e vendimit, duke thënë se propozimi nga drejtuesja e Top Channel, Lori Hoxha, ishte një “bekim” që erdhi në kohën e duhur.
Duma shpjegoi se nuk ndihej e detyruar të vazhdonte në politikë; përveç jetës, shëndetit dhe dashurisë për fëmijën e saj, nuk kishte kushte të tjera që ta mbanin. Ajo tha se kishte mundësinë të fillonte nga e para dhe të ndërtonte një standard jete që i përshtatej, duke theksuar se nuk i duhej shumë për të jetuar mirë. Përshkroi mënyrën si CEO i Top Channel po rikonceptonte televizionin dhe se propozimi e la pa frymë, duke e konsideruar si një shenjë.
Gjatë bisedës, Duma argumentoi se humbi dëshirën për të qenë pjesë e një grupimi politik që, sipas saj, kishte humbur kohezionin, shumësinë dhe qartësinë. Ajo rikujtoi zgjedhjet lokale të dy viteve më parë dhe një protagonist të Partisë Demokratike në emisionin e saj që e pyeti “Si ta bënim PD-në? Ti ike, disa të tjerë ikën.” Duma iu përgjigj me humor “Sepse ju u çmendët” dhe vuri në dukje fragmentarizimin e partisë, mungesën e mirëkuptimit, mungesën e kohezionit dhe tendencën për të vënë fajin brenda radhëve, ndërsa sipas saj përgjegjësia kishte qenë në udhëheqje, veçanërisht mes Sali Berishës dhe Lulzim Bashës, ose mes Sali Berishës dhe vetes së tij.
Moderatorja dhe autore e “Top Story” pranoi se pati dyshime fillimisht dhe se në fillim kishte menduar të përpiqej të qëndronte edhe në media edhe në politikë. Megjithatë, ajo tha se vendimi për të qëndruar në media ishte i duhur dhe se njerëzit duhet të kenë guxim për të bërë një zgjedhje; duke vlerësuar, sipas fjalëve të saj, se ajo bëri zgjedhjen e duhur kur shikon mënyrën si janë sot pjesëmarrësit e “establishment”-it politik aktual.
