Marrëveshja në fjalë vlerësohet rreth 3 miliardë dollarë, pasi Brookfield bleu 26% të mbetur të aksioneve të Oaktree, ndërsa më parë zotëronte 74% të kompanisë. Vlera totale e Oaktree raportohet rreth 10 miliardë dollarë. Për Interin, nuk pritet të ketë ndryshime të menjëhershme në strukturën e kontrollit: Oaktree vazhdon të jetë subjekti që merr vendimet për klubin, ndërsa Brookfield bëhet pronari i tij. Edhe pse Oaktree tani është pjesë e një grupi shumë më të madh financiar, menaxhimi i klubit mbetet në duart e drejtuesve aktualë të fondit amerikan.
Brookfield përshkruhet si një gjigant botëror që menaxhon rreth 1 mijë miliardë dollarë asete, ndërsa Oaktree administron rreth 225 miliardë dollarë; bashkimi i tyre krijon një fuqi të madhe në tregun financiar ndërkombëtar. Në dokumentet e fundit për projektin e stadiumit të ri San Siro, kontrolli i Interit vazhdon të figurojë te Oaktree Capital Management, e cila vepron si menaxhuese e investimeve.
Pas Interit qëndrojnë investitorë të mëdhenj institucionalë, përfshirë fonde sovrane, fonde pensioni dhe investitorë profesionistë, por vendimet strategjike merren nga drejtuesit e Oaktree. Howard Marks dhe Bruce Karsh pritet të vazhdojnë të jenë figura kryesore të Oaktree-s dhe do të kenë gjithashtu role drejtuese në strukturën e re me Brookfield.
Për tifozët zikaltër, mesazhi thelbësor është se pronësia e klubit nuk ndryshon menjëherë; Interi bëhet pjesë e një fuqie financiare më të madhe. Qëllimi i kësaj lëvizjeje paraqitet si forcimi i investimeve dhe zgjerimi global i biznesit, ndërsa për klubin pritet të sigurojë një garanci më shumë për stabilitet financiar dhe realizimin e projekteve afatgjata.
