Mbi 100 kafshë të shpëtuara nga zjarri shkatërrues në Atikën, në Greqi janë strehuar në një qendër të përkohshme të ngritur në dhomat e zhveshjes së stadiumit të futbollit në Vilia, falë bashkëpunimit mes autoriteteve lokale dhe dhjetëra vullnetarëve. Nisma u realizua nga Bashkia, organizata Dogs’ Voice, shoqata lokale për mbrojtjen e kafshëve “Adespotes Psyches” dhe dashamirës të kafshëve nga zona.
Që në ditët e para, banorët dhuruan ushqime dhe medikamente, ndërsa shumë vullnetarë u angazhuan për kujdesin e përditshëm të kafshëve, duke përfshirë shëtitjen e qenve. Macet e shpëtuara janë transferuar gradualisht në Megara. Nënkryetari i Bashkisë, përgjegjës për mbrojtjen e kafshëve, Dimitris Pagonis, tha se në strehën e përkohshme janë grumbulluar rreth 100 qen dhe mace, si edhe 30–40 kafshë blegtorale, të cilat po mbahen në stalla derisa të merren nga pronarët e tyre.
Pagonis vlerësoi kontributin e vullnetarëve dhe njoftoi se një pjesë e kafshëve tashmë janë ribashkuar me pronarët e tyre, ndërsa disa kafshë endacake janë adoptuar. Për kafshët që kanë mbetur në strehë, autoritetet po punojnë për t’i rikthyer gradualisht në zonat ku jetonin, duke u siguruar që ato të kthehen në një mjedis të sigurt dhe te personat që kujdeseshin më parë për to. Duke iu referuar rasteve të kafshëve që u gjetën vetëm në zonat e evakuara, Pagonis kërkoi të mos nxirren përfundime të nxituara për braktisjen e tyre, duke shpjeguar se në fatkeqësi disa njerëz mund të mos kenë mundur të kthehen në shtëpitë e tyre.
Ai njoftoi gjithashtu se kafshët e lënduara kanë marrë kujdes të përditshëm veterinar në klinikën e bashkisë, me mbështetjen e veterinerëve të organizatës Dogs’ Voice. Sipas Pagonis, shumica e lëndimeve kanë qenë të lehta, kryesisht djegie në putra, dhe kafshët pritet të rikuperohen plotësisht brenda një kohe të shkurtër.
