Drejtori i Zhvillimit Global të Futbollit në FIFA, Arsène Wenger, sqaroi se nuk kishte qenë i përfshirë në projektin e quajtur FIFA Forward Enterprise (FFE) dhe se për të kishte mësuar vetëm përmes raportimeve në media. “Nuk kam qenë i përfshirë në këtë plan strategjik dhe për herë të parë mora dijeni për të nga mediat”, deklaroi ai, duke shtuar se vendimi për tërheqjen e projektit ishte i domosdoshëm dhe i padiskutueshëm, pasi beson te një FIFA e pavarur që shërben futbollit me përkushtim, transparencë dhe integritet. Wenger theksoi se nuk ka ndërmend të japë dorëheqjen, ndryshe nga këshilltari i lartë Carlos Cordeiro, dhe rikujtoi se detyrat e tij në FIFA përfshijnë analizën e të dhënave, zhvillimin e akademive të të rinjve, programet e trajnimit online dhe rolin si këshilltar teknik i IFAB.
Deklarata e Wenger shfaqet ndërsa presioni ndaj presidentit të FIFA-s, Gianni Infantino, është rritur. Plani për krijimin e FIFA Forward Enterprise dhe shitjen e 20% të aksioneve te fondet private të investimeve hasi në kundërshtimin e fuqishëm të tre konfederatave kontinentale; UEFA paralajmëroi se mund të bojkotonte Kupën e Botës dhe kompeticionet e tjera të FIFA-s nëse projekti do të vazhdonte. Njëkohësisht, Federata Angleze e Futbollit pritet t’i konfirmojë FIFA-s tërheqjen e mbështetjes për Infantinon, ndërsa Federata e Uellsit ka njoftuar tashmë vendimin e saj. UEFA, edhe pse mirëpriti anulimin e projektit, deklaroi se ka humbur besimin te drejtimi i Infantinos.
Klubet evropiane shprehën shqetësime se projekti mund të kishte ndikuar në marrëveshjet ekzistuese për të drejtat tregtare të kompeticioneve, sidomos për Kupën e Botëve për Klube; aktualisht FIFA nuk ka marrëveshje me organizatën e klubeve evropiane për edicionin e vitit 2029. Kontroversat u shtuan më tej pas deklaratës së drejtorit operativ të FIFA-s, Kevin Lamour, i cili tha se stafi i qeverisë botërore të futbollit ishte “mashtruar” nga presidenti Infantino lidhur me këtë projekt. Top Channel.
