Presioni ndaj presidentit të FIFA-s, Gianni Infantino, është rritur ndjeshëm pasi u zbulua një email i dërguar punonjësve të organizatës nga sekretari i përgjithshëm Mattias Grafström. Lidhur me mesazhin – i publikuar këtë të martë nga Le Monde dhe The Athletic – Grafström u distancua zyrtarisht nga kreu i FIFA-s, siguroi stafin se do të mbrohet dhe adresoi kritika të tërthorta kundër Infantinos.
Në letër, numri dy i FIFA-s trajtoi për herë të parë polemikat lidhur me projektin e Infantinos për shitjen e aksioneve të Kupës së Botës, FIFA Forward Enterprise (FFE), i cili u braktis pas protestash globale dhe ndikoi në krizën e brendshme të organizatës. Grafström përshkroi situatën si “një javë të jashtëzakonshme, por tepër të vështirë për të gjithë stafin e FIFA-s”, duke theksuar se punonjësit u gjenden “në një trazirë që është e vështirë për t’u kuptuar dhe pranuar”. Për këtë arsye ai zgjodhi të drejtohej së pari te administrata.
Pa përmendur Infantinon me emër, Grafström i dha stafin garanci mbështetjeje: “Si anëtarë të administratës, ju do të jeni të mbrojtur përballë klimës aktuale politike.” Ai gjithashtu deklaroi se “individët, periudhat e paqëndrueshmërisë dhe ngjarjet e pafat vijnë e shkojnë”, duke e konsideruar planin e kontestuar si “një sërë ngjarjesh të trishtueshme dhe të dënueshme”, por nënvizoi se këto nuk duhet të errësojnë punën dhe suksesin e organizimit të Kupës së Botës 2026.
Distancimi i Grafström vjen pas një seri goditjesh ndaj drejtimit të FIFA-s. Ai mori detyrën në fund të vitit 2023, duke zëvendësuar Fatma Samoura, e cila dha dorëheqjen pasi roli i saj u dobësua me politikën e centralizimit të pushtetit nga Infantino. Emërimi i suedezit u perceptua fillimisht si konsolidim i pozitave të presidentit, por zhvillimet e fundit tregojnë ndarje brenda rrethit të ngushtë të udhëheqjes. Kohët e fundit, Kevin Lamour u largua kritikues ndaj modelit “një njeriu të vetëm”, ndërsa Arsène Wenger, Drejtor i Zhvillimit Global të Futbollit, doli hapur kundër projektit dhe e konsideroi të nevojshme braktisjen e tij.
