Administrata e presidentit amerikan Donald Trump po shqyrton alternativa për të rritur presionin ndaj Iranit, pasi operacionet ushtarake të deritanishme nuk kanë arritur ta detyrojnë Teheranin të kthehet në negociata sipas kushteve të Uashingtonit. Sipas CNN, një oficer i lartë i degës së inteligjencës në Komandën Qendrore të SHBA-së (CENTCOM) i ka dërguar analistëve ushtarakë një email, duke kërkuar “ide të reja, krijuese dhe jokonvencionale” për të ushtruar më shumë presion ndaj Iranit. Në mesazh theksohet nevoja për mënyra të reja për ta “ndëshkuar” dhe detyruar Iranin të ndryshojë qëndrim; burime pranë ushtrisë e kanë cilësuar nismën si të pazakontë.
Zëdhënësi i CENTCOM, kapiteni Timothy Hawkins, konfirmoi se komanda ka traditë në kërkimin e zgjidhjeve inovative dhe se komandanti, admirali Brad Cooper, inkurajon kontributin e të gjithë personelit, pavarësisht gradës. Kërkesa për ide vjen ndërsa Shtetet e Bashkuara kanë kryer sulme të shumta ajrore ndaj objektivave iraniane, por pa arritur qëllimin e detyrimit të Teheranit për të pranuar një marrëveshje.
Raportohet se Trump ka shqyrtuar mundësinë e një vale të re bombardimesh ndaj objekteve bërthamore iraniane, përfshirë instalacionet e ndërtuara thellë nën tokë; ekspertët ushtarakë vlerësojnë se edhe armët më të fuqishme konvencionale nuk do të mjaftonin për të shkatërruar plotësisht këto objekte. Burime të njohura me planet thonë se një operacion tokësor do të ishte shumë i rrezikshëm dhe se presidenti nuk është i gatshëm të autorizojë dërgimin e trupave në Iran.
Si CIA ashtu edhe Agjencia e Inteligjencës së Mbrojtjes (DIA) kanë vlerësuar se fushata aktuale e bombardimeve ka pak gjasa të ndryshojë pozicionin negociues të Iranit. Edhe kreu i Shtabit të Përgjithshëm, gjenerali Dan Caine, ka pranuar se fuqia ajrore ka kufizimet e saj dhe se bombardimet e vetme nuk mund të realizojnë të gjitha objektivat strategjikë të Shtëpisë së Bardhë.
Administrata vazhdon të analizojë skenarë të ndryshëm, nga intensifikimi i sulmeve deri te mbajtja e presionit aktual, me synimin e arritjes së një marrëveshjeje me Iranin pa u përfshirë në një luftë të gjatë tokësore.
