Një shpërthim me bombë në restorantin “Balzi Rossi” në qendër të Moskës ka shkaktuar pesë viktima dhe dyshohet se ishte një atentat i planifikuar ndaj gjeneralit rus Alexander Chaiko. Sipas mediave ruse, Chaiko, 55 vjeç, ndodhej në restorant pranë Kremlinit, ku po festonte ditëlindjen së bashku me politikanë, oficerë të lartë dhe pjesëtarë të inteligjencës ruse.
Nga shpërthimi kanë humbur jetën pesë persona, mes tyre dhëndri i gjeneralit, 27-vjeçari Daniil Perendry, ish-lojtar profesionist hokeji. Një grua që, sipas hetimeve paraprake, kishte transportuar pajisjen shpërthyese brenda restorantit, po ashtu mbeti e vrarë nga shpërthimi. Vajza e gjeneralit, Maria Perendry, 25 vjeçe, është plagosur rëndë në kokë. Në total, 19 persona u raportuan të lënduar. Autoritetet njoftojnë se pajisja shpërthyese e improvizuar përmbante elementë metalikë që shkaktuan dëmtime të shumta tek personat pranë saj.
Hetimet janë nisur për të zbardhur autorët dhe motivin e sulmit. Nga burimet e para rezulton se pajisja ishte futur në ambient nga një person i jashtëm, por autoritetet ende nuk kanë konfirmuar zyrtarisht përgjegjësinë, identitetin e autorëve apo nëse sulmi lidhet me konfliktin në Ukrainë.
Alexander Chaiko ka qenë komandant i forcave ruse gjatë fazave të para të luftës në Ukrainë. Në vitin 2022, Ukraina e akuzoi atë për përgjegjësi në operacionet ruse në zonën e Buçës, ku u raportuan qindra viktima civile gjatë pushtimit rus. Kiev i ka vënë në barrë Chaikon si “kriminel lufte”, ndërsa Moska ka mohuar vazhdimisht akuzat për krime ndaj civilëve.
Hetimet për shpërthimin në Moskë vazhdojnë, pa një konfirmim zyrtar për autorët apo lidhjen eventuale me ngjarjet dhe akuzat që lidhen me veprimtarinë e gjeneralit në Ukrainë.
