Prej gjashtë ditësh po digjet një pjesë e zonës pyjore të fshatit Dardhë, në Bashkinë e Librazhdit, dhe përpjekjet për të vënë flakët nën kontroll përballen me vështirësi të mëdha për shkak të terrenit malor, erës së fortë dhe temperaturave të larta. Dhjetëra forca të shërbimit zjarrfikës të Librazhdit, të mbështetura nga strukturat e emergjencave civile, janë angazhuar pa ndërprerje në terren për izolimin e vatrave aktive dhe parandalimin e përhapjes së mëtejshme. Megjithatë, kushtet atmosferike kanë favorizuar avancimin e flakëve në një sipërfaqe të gjerë me bimësi të thatë dhe pyje.
Terreni i thyer malor e bën të vështirë ndërhyrjen me mjete zjarrfikëse, duke i detyruar ekipet të punojnë kryesisht në këmbë në shumë sektorë për të frenuar përhapjen e zjarrit. Prioriteti i autoriteteve mbetet mbrojtja e sipërfaqeve pyjore dhe shmangia e përhapjes së flakëve jashtë zonës së vënë aktualisht nën kontroll. Sipas raportimeve, vatra e zjarrit është larg zonave të banuara dhe nuk ka rrezikim të banesave, ndërsa autoritetet vijojnë monitorimin e situatës në terren.
Zona që po digjet ka grumbullime të mëdha të lëndës drusore të thatë, të cilat janë mbetur pas nga shfrytëzimet e paligjshme të ekonomisë pyjore gjatë dekadës së fundit, duke favorizuar përhapjen e zjarrit në të gjithë sipërfaqen. Mungesa e një mase të qëndrueshme vegetacioni të lagësht dhe prania e materialit të thatë shtojnë kompleksitetin e ndërhyrjeve.
Agjencia Kombëtare e Mbrojtjes Civile kishte paralajmëruar disa ditë më parë Qarkun e Elbasanit si një nga rajonet me rrezik shumë të lartë për shpërthim dhe përhapje zjarresh, për shkak të valës së të nxehtit dhe temperaturave ekstreme që kanë prekur vendin gjatë fundjavës. Ekipet lokale dhe strukturat e emergjencave vijojnë punën për izolimin e vatrave, ndërsa situata mbetet e ndjeshme për shkak të kushteve klimatike dhe tipologjisë së terrenit.
