Përplasja mes UEFA-s dhe FIFA-s është thelluar pasi UEFA po shqyrton mundësinë e ndërmarrjes së veprimeve ligjore ndaj FIFA-s dhe presidentit të saj, Gianni Infantino. Sipas raporteve britanike, UEFA i ka dërguar Infantinos një letër zyrtare ku njofton se po vlerëson ngritjen e një padie, arbitrazhi ose ankese rregullatore lidhur me planin tashmë të braktisur për shitjen e një pjese të të drejtave tregtare të Kupës së Botës tek investitorë privatë.
Plani i propozuar nga Infantino parashikonte shitjen e aksioneve të turneut përmes një strukture të re financiare dhe shkaktoi reagime të forta në botën e futbollit. Për shkak të presionit nga UEFA, konfederatat e tjera dhe sponsorët, FIFA më pas u tërhoq nga projekti. Megjithatë, UEFA kërkon që FIFA dhe Infantino të ruajnë të gjitha dokumentet dhe të dhënat elektronike lidhur me projektin dhe paralajmëron se shkatërrimi ose fshirja e provave mund të sjellë pasoja ligjore.
Në dokument thuhet se UEFA “po shqyrton në mënyrë aktive ndërmarrjen e veprimeve ligjore, arbitrazhit dhe ankesave rregullatore” në lidhje me këtë plan. Përveç FIFA-s dhe Infantinos, në procedurat e mundshme ligjore mund të përfshihen edhe investitorë dhe institucione financiare që ishin pjesë e projektit, mes tyre emra të përmendur nga raportimet: miliarderi Joshua Kushner, Greg Maffei, JP Morgan dhe OpenEconomics. UEFA u ka kërkuar gjithashtu këtyre palëve të mos fshijnë apo shkatërrojnë asnjë material që lidhet me projektin e dështuar.
Marrëdhëniet mes presidentit të UEFA-s, Aleksander Čeferin, dhe Infantos kanë qenë të tensionuara prej kohësh, dhe kjo çështje ka thelluar konfliktin midis dy institucioneve. Raportimet shtojnë se UEFA kishte paralajmëruar se federatat e saj mund të bojkotonin Kupën e Botës nëse projekti do të miratohej. Edhe pse FIFA ka hequr dorë nga plani, UEFA nuk e ka përjashtuar mundësinë e ndjekjes së rrugës ligjore dhe i ka dhënë Infantinos pesë ditë pune për të konfirmuar se do të ruajë të gjitha provat dhe dokumentet që lidhen me çështjen.
