Ded Bajraktari deklaron se ka qenë dëshmitar i dhjetëra rasteve në të cilat, sipas tij, Kardinali Ernest Simoni Troshani, i cili i kreu studimet teologjike në fshehtësi për shkak të persekutimit të Kishës nga regjimi komunist në Shqipëri, i ka ndihmuar njerëzit në betejat e tyre për shëndetin gjatë kohës që shërbente në Fushë Arrëz dhe qytete të tjera në veri të vendit. “Shkonte, bënte Meshë, u çonte një uratë, i kapte nga koka, u fërkonte duar, dhe e vinim re që këta njerëz, vinin pas një jave dhe thoshin ‘jam mirë’”, tha Bajraktari.
Ai përshkruan një episod të pazakontë gjatë një udhëtimi si shofer me kardinalin drejt Fushë Arrëzit në një ditë të acartë dimri për të bekuar disa persona me probleme shëndetësore, kur rruga u bë e rrezikshme për shkak të ngricave. Sipas tij, në vendin e quajtur Kroni i Zojës, aty ku ka humbur jetën Myslym Keta, makina rrëshqiti dhe rrezikoi të binte në shkëmb dhe humnerë. “Makina u kthye tërësisht. Kur po i afroheshim humnerës, Ernest Troshani tha ‘O Zot, o Krisht’. Makina ndaloi. Më tha mua ‘ndalo se shpëtuam’”, rrëfeu Bajraktari, duke e cilësuar ngjarjen një mrekulli.
Bajraktari e quan kardinalin “njeriun e mrekullive” dhe thotë se e ritakoi gjatë Meshës së Shenjtë që Ernest Simoni Trashi mbajti në Spaç, vend ku kishte vuajtur dënimin pas arrestimit gjatë diktaturës. Ai përmend një moment personal kur kardinali e kapte për dore dhe e njihte: “Më kapi te dora dhe unë i them ‘jam ai djali nga Fushë Arrëzi. E di më tha. Më mbante mend’”.
Teksti thekson se kardinali, sot 98-vjeçar, përballoi tortura dhe kushte të ashpra gjatë 18 viteve në burg dhe paraqitet si dëshmi e besimit, faljes dhe shpresës.
