Rasti i biznesmenit shqiptar Ermal Beqiraj ka marrë vëmendje në mediat franceze pas arrestimit të tij në Francë për fluturimin me avion të lehtë mbi centralin bërthamor Penly në Normandi. Shqipëria ka kërkuar ekstradimin e tij, ndërsa ai ndodhet në paraburgim në pritje të procedurave.
Sipas raportimeve franceze, Beqiraj u arrestua në aeroportin Albert, në veri të Francës, pas fluturimit mbi centralin bërthamor Penly, një nga zonat e përzgjedhura nga qeveria franceze për ndërtimin e reaktorëve të rinj bërthamorë EPR2. Për këtë ngjarje, biznesmeni shqiptar u gjykua në procedurë të përshpejtuar nga gjykata në Amiens dhe u dënua me 7 mijë euro gjobë. Më pas ai u vendos në paraburgim, pasi autoritetet shqiptare kishin kërkuar ekstradimin e tij.
Mediat franceze i referohen edhe hetimit të SPAK në Shqipëri, ku Beqiraj dyshohet për përfshirje në një skandal korrupsioni të lidhur me tendera me vlerë miliona euro. Sipas autoriteteve shqiptare, ndaj tij është lëshuar urdhër arresti për mashtrim të organizuar. Hetimet kanë zbuluar gjithashtu pasuri që dyshohet se kanë origjinë kriminale.
Sipas SPAK, pasuritë e identifikuara përfshijnë llogari bankare me vlerë mbi 2 milionë euro, dy apartamente, një avion turistik, automjete dhe një pronë luksoze në departamentin e Oise, e vlerësuar rreth 2.6 milionë euro. Autoritetet franceze, në bashkëpunim me ato shqiptare, kanë nisur procedurat për sekuestrimin e pasurive të identifikuara.
Prokuroria franceze njofton se procesi i ekstradimit të Ermal Beqirajt drejt Shqipërisë mund të zgjasë disa javë. Beqiraj mbetet në paraburgim ndërsa vazhdojnë procedurat gjyqësore dhe bashkëpunimi ndërmjet autoriteteve franceze dhe shqiptare për hetimin dhe sekuestron e pasurive.
