Policia Rrugore e Tiranës njofton se gjatë javës së fundit, në kuadër të kontrolleve të shtuara në akset kryesore dhe zonat me fluks të lartë, janë konstatuar 12 505 shkelje të rregullave të qarkullimit rrugor. Kontrollet u realizuan me praninë e shtuar të shërbimeve dhe me mjete logjistike bashkëkohore, me qëllim parandalimin e aksidenteve.
Si rezultat i monitorimeve u evidentuan 24 raste të veprave penale në fushën e qarkullimit rrugor, autorët e të cilëve u arrestuan ose u proceduan penalisht. Në një rast, drejtuesi i një automjeti u procedua penalisht për tentativë korrupsioni, pasi i ofroi punonjësit të Policisë një kartëmonedhë 2 000 lekë të rinj për të shmangur masën administrative; ky drejtues po ashtu drejtonte automjetin pa vendosur rrip sigurimi.
Gjatë kontrolleve janë konstatuar raste të drejtimit të mjetit në gjendje të dehur, përdorimit të celularit gjatë drejtimit, mungesës së rripit të sigurimit dhe shkeljesh të tjera që rrezikojnë sigurinë rrugore. Konkretisht, u vendosën 74 masa për mospozicionim të rregullt në karrexhatë, një shkelje që nxit manovra të gabuara dhe krijon kaos në trafik; 12 masa për drejtim të mjetit nën efektin e alkoolit; dhe janë ndaluar/pushuar 31 automjete në kundërshtim me parashikimet e Kodit Rrugor. Për përdorim të celularit gjatë drejtimit, mungesë rripi sigurimi dhe mungesë kaskë mbrojtëse për motomjetet, janë vendosur gjithsej 1 562 masa administrative.
Policia Rrugore apelon për respekt rigoroz të rregullave të qarkullimit, shmangien e drejtimit të mjetit në gjendje të dehur apo pa leje drejtimi, dhe për rritje të përgjegjshmërisë nga të gjithë përdoruesit e rrugës, me qëllim garantimin e parametrave të sigurisë rrugore.
