Gjatë samitit të NATO-s disa javë më parë, kryeministri Edi Rama u intervistua nga influenceri dhe sipërmarrësi ukrainas Max Klymenko. Pyetjet prekën si çështje politike, ashtu edhe detaje personale si orët e gjumit, pasionet sportive dhe marrëdhëniet me liderë europianë. Klymenko e përshëndeti Ramën dhe nisi bisedën me pyetje rreth sfidave dhe kënaqësive të punës së tij; Rama përmendi si pjesën më të vështirë “të mos çmendesh” dhe si pjesën e preferuar “gjërat që janë të mira për njerëzit”.
Në lidhje me mbështetjen për Ukrainën, Rama tha se Shqipëria ka bërë më të mirën me resurset që disponon, duke theksuar se vendi nuk është i madh apo i pasur, por ka qenë pranë Ukrainës “me gjithçka që kemi mundur”. Për kërcënimet ndaj Shqipërisë, ai vuri në dukje se kërcënimi më i madh janë vetë shqiptarët në kuptimin e nevojës për punë të brendshme dhe përparim drejt Bashkimit Evropian; Rama tha se anëtarësimi në BE do të siguronte vendin edhe ndaj vetvetes.
Pyetjes për orët e gjumit, Rama deklaroi se mesatarisht fjet rreth pesë orë, ndonjëherë edhe më pak. Për marrëdhëniet me liderët botërorë, ai tha se ka marrëdhënie të mira me të gjithë; veçoi një marrëdhënie të mirë me kryeministren italiane Giorgia Meloni dhe theksoi lidhjen e veçantë mes Shqipërisë dhe Italisë. Për Mark Rutte, Rama tha se marrëdhënia kishte qenë shumë sfiduese gjatë kohës kur Rutte ishte kryeministër i Holandës, por më pas u bënë shumë miq dhe kanë një miqësi të veçantë; Rama gjithashtu e përmendi Rutte si njeri që di ta menaxhojë Donald Trump-in.
Rama renditi aktivitetet e tij të mëparshme: ka qenë artist me kohë të plotë dhe më pas u përfshi në politikë, si dhe ka luajtur basketboll deri në ekipin kombëtar, kryesisht për shkak të gjatësi. Në fund, në pyetjen për këshillën për të rinjtë, Rama tha se si fëmijë ishte i sikletosur t’u jepte këshilla të tjerëve dhe si i rritur i kishte premtuar vetes se nuk do t’u jepte këshilla të rinjve, duke shtuar “Nuk është ide e mirë.”
Klymenko është një krijues përmbajtjesh me bazë në Londër, i njohur për serinë “Career Ladder”, i përfshirë në Forbes 30 Under 30 Europe (2024) dhe fitues i “Creator of the Year” në TikTok UK (2025).
