Një grua 57-vjeçare akuzohet në SHBA se mbajti të izoluar djalin e bashkëshortit të saj për më shumë se 20 vjet, duke e privuar nga ushqimi, kujdesi mjekësor dhe kushtet bazë të jetesës. Viktima 34-vjeç, i identifikuar me inicialin “S”, u shpëtua më 17 shkurt 2025, pasi i vuri zjarrin shtëpisë ku jetonte. Ai i tha autoriteteve se zjarri ishte e vetmja mënyrë për të fituar lirinë: “Doja lirinë time”, dhe se përdori letër printeri, dezinfektues duarsh dhe një çakmak për të ndezur flakët.
Sipas dëshmisë së tij, ishte mbajtur i mbyllur në një dhomë prej vetëm 6.7 metrash katrorë për 22 deri në 24 orë në ditë, dhe kuptonte në cilin vit ndodhej vetëm duke dëgjuar radion. Kur u gjet, dhoma ishte e mbuluar me papastërti. Hetuesit raportuan se ai ishte 1.68 metra i gjatë dhe peshonte vetëm 34 kilogramë, dhe se ishte nënshtruar urisë, abuzimit të vazhdueshëm, neglizhencës së rëndë dhe trajtimit çnjerëzor për mbi dy dekada.
Ai tha se zakonisht ushqehej me një ose dy sanduiçe në ditë, ndërsa në raste të tjera detyrohej të hante mbetje ushqimore nga koshat e plehrave dhe të pinte ujë nga tualeti për të mbijetuar. Pas vdekjes së babait biologjik në vitin 2024, izolimi u bë më i rëndë, dhe kërcënimet për t’u lënë pa ushqim ose për t’u izoluar më gjatë e penguan të kërkonte ndihmë. Përditshmërinë e kalonte duke numëruar makinat që kalonin ose duke dëgjuar radion; rrëfeu se prisnte vetë flokët, nuk ishte larë prej vitesh, nuk kishte shkuar kurrë te dentisti, përdorte gazeta dhe shishe plastike për nevojat fiziologjike dhe kishte improvizuar një sistem për largimin e urinës përmes dritares.
Ai deklaroi se babai dhe dy motrat ishin në dijeni të situatës, por nuk ndërhynë, dhe se ishte kërcënuar që të mos fliste kur vinin vizitorë: “Më mbajtën të fshehur gjithë jetën time”. Familja ishte denoncuar për herë të parë në vitin 2005 nga shkolla; drejtori i shkollës fillore, Tom Panone, tha se stafi kishte vënë re se fëmija ishte tepër i dobët dhe shpesh vidhte ushqim ose hante nga koshat e plehrave. Prokurorët krahasuan gjendjen e 34-vjeçarit me atë të një të mbijetuari të Aushvicit, duke e cilësuar trajtimin si ekstremisht çnjerëzor.
57-vjeçarja Kimberly Sullivan mohon akuzat. Avokati i saj, Ioannis Kaloidis, i ka quajtur pretendimet “skandaloze” dhe “të pavërteta”, dhe ka deklaruar se klientja nuk do të pranojë marrëveshjen për pranimin e fajësisë. Çështja pritet të shqyrtohet sërish më 4 shtator; nëse shpallet fajtore, Sullivan mund të përballet me dënim të rëndë me burg.
