Portieri 40-vjeçar i kombëtares së Kepit të Gjelbër, Vozinha, mund të përjetojë një kthesë të papritur në karrierë, pavarësisht se klubi kilian Colo-Colo kishte njoftuar më herët transferimin e tij. Pas paraqitjeve të spikatura në Kupën e Botës, ku u bë një nga emrat më të përfolur të verës, Vozinha udhëhoqi reprezentacionin e tij drejt një fushate historike. Ai shkëlqeu me pritjet ndaj skuadrave si Spanja, Uruguai dhe Arabia Saudite, ndërsa Kepi i Gjelbër arriti në fazën e play-off-it, ku u eliminua në kohën shtesë pas një humbjeje 3-2 ndaj Argjentinës.
Përformanca e tij në Botëror i siguroi vendin në formacionin e më të mirëve të turneut, përkrah yjeve si Lionel Messi, Jude Bellingham dhe Kylian Mbappe. Pas largimit nga Chaves në qershor, Colo-Colo iu afrua si lojtar i lirë dhe kishte shpallur zyrtarisht afrimin e tij. Megjithatë, marrëveshja duket tani e pasigurt.
Sipas gazetarit Raphael Bozeo, skuadra marokene Berkane po përpiqet të ndërhyjë dhe të sigurojë shërbimet e portierit veteran. Raportimet thonë se Berkane është pranë paraqitjes së një oferte zyrtare, ndërsa klubi maroken thuhet se ka arritur gjithashtu një marrëveshje me trajnerin e Kepit të Gjelbër, Bubista, për të marrë drejtimin e skuadrës.
Përveç kësaj, Vozinha ka shtyrë tri herë mbërritjen e tij në Kili, gjë që ka rritur pasigurinë rreth finalizimit të transferimit me Colo-Colo. Ai ishte pritur të mbërrinte fillimisht të martën, më pas u shty për të mërkurën dhe më pas për të enjten, por portieri nuk u paraqit në asnjë nga datat e caktuara.
Lajmet mbi interesin e Berkane dhe shtyrjet e mbërritjes së Vozinhas krijojnë paqartësi për të ardhmen e transferimit që Colo-Colo kishte bërë publike. Ende nuk ka konfirmim zyrtar për ndryshimin e destinacionit të portierit nga asnjë nga palët e përfshira. Top Channel.
