Një 35-vjeçare nga Britania e Madhe u dënua me nëntë vjet burg pasi u shpall fajtore për vrasje për rolin e saj në një sulm me acid që i shkaktoi vdekjen ish-bashkëshortit. Viktima, Danny Cahalane, baba i dy fëmijëve, u sulmua në banesën e tij në Plymouth në shkurt 2025, kur dy persona hynë dhe i hodhën acid sulfurik në trup. Ai u dërgua me urgjencë në spital dhe ndërroi jetë më 3 maj 2025 si pasojë e djegieve të rënda.
Në procesin gjyqësor u ulën në bankën e të akuzuarve nëntë persona, përfshirë ish-bashkëshorten Paris Wilson, të cilën gjykata e konsideroi si një pjesëmarrëse kyçe në organizimin e sulmit. Gjatë gjyqit u provua se Wilson kishte treguar vendndodhjen e Cahalane një bosi të drogës me bazë në Dubai, i njohur me nofkën “Frost”. Sipas prokurorisë, ai kërkonte hakmarrje pasi Cahalane i detyrohej rreth 120 mijë paund, të humbura nga aktivitetet e lojërave të fatit.
Prokuroria tha se Wilson veproi nga lakmia, hakmarrja ose të dyja, duke pranuar të ndihmonte bandën në këmbim të parave. Pak ditë para sulmit, ajo i kishte dërguar ish-bashkëshortit një mesazh kërcënues: “Shpresoj që ty dhe të dashurës tënde të përfundoni me acid në fytyrë.” Gjykata dëgjoi edhe mesazhe të tjera ku Wilson bisedonte me nënën e saj për pagesat që do të merrte nëse ndihmonte bandën të gjente Cahalane.
Sipas prokurorisë, pas një tentative të dështuar për rrëmbim, organizatorët urdhëruan sulmin me acid. Dy autorët që hodhën acidin u shpallën fajtorë për vrasje, ndërsa persona të tjerë u dënuan për përfshirje në planifikimin e krimit. Gjyqtari theksoi se Wilson kishte qenë në dijeni të rrezikut real që i kanosej ish-bashkëshortit dhe megjithatë kishte ndihmuar autorët.
Wilson ishte akuzuar fillimisht për vrasje, por u shpall fajtore për vrasje nga pakujdesia; gjatë seancës ajo shprehu pendesë për vdekjen e ish-bashkëshortit, duke thënë se i vinte thellësisht keq për humbjen e jetës së tij.
