Të paktën dy alpinistë kanë vdekur si pasojë e një orteku në malin Broad Peak në Pakistan, ndërsa tetë anëtarë të tjerë të ekipit të udhëhequr nga alpinisti i njohur nepalez Nirmal Purja rezultojnë ende të zhdukur. Klubi Alpin i Pakistanit konfirmoi vdekjen e Nadirës Al Harthi nga Omani dhe Pur Bahadur Gurung “Yukta” nga Nepali. Sipas klubit, trupi i Nadirës është gjetur dhe po transportohet me helikopter për në vendin e saj, ndërsa marrëveshjet për transportimin e Yuktës po finalizohen. Operacionet e kërkim-shpëtimit për të zhdukurit po vazhdojnë, dhe në deklaratë u shprehën ngushëllime për familjet e viktimave dhe komunitetin ndërkombëtar të alpinizmit.
Nirmal Purja, i njohur me nofkën “Nimsdai”, është një nga tre alpinistët rekordmenë që së bashku me Mingma David Sherpa dhe Tejan Gurung drejtojnë kompaninë Elite Exped, e specializuar në ekspedita drejt majave më të larta. I lindur në Nepal, Purja ka shërbyer 16 vjet në ushtri — gjashtë vjet në Regjimentin Gurkha dhe dhjetë vjet në Forcat Speciale Detare të Mbretërisë së Bashkuar (SBS). 43-vjeçari mban rekordin për ngjitjen më të shpejtë të 14 majave mbi 8,000 metra, çka e ka bërë një figurë të njohur në alpinizëm.
Autoritetet lokale thanë se orteku goditi ekipin ndërsa po lëviznin nga Kampi 2 drejt Kampit 3, me synimin për të vijuar ngjitjen ndaj majës. Në ekspeditë ishin të përfshirë gjithsej 10 alpinistë, përfshirë edhe Purjan. Mediat lokale raportuan se orteku ra rreth mesditës së së enjtes në vargmalin Karakoram dhe që prej asaj kohe nuk ka pasur asnjë kontakt me grupin. Operacionet e shpëtimit me helikopter u penguan nga kushtet e vështira atmosferike. Megjithatë, ekipet e shpëtimit mbeten me shpresë, pasi pajisja gjurmuese e Purjas ka regjistruar disa lëvizje edhe pas ortekut.
