UEFA dhe 55 federatat e saj anëtare publikuan një deklaratë të përbashkët ku shprehin kundërshtimin e plotë ndaj propozimit të FIFA-s për transferimin e interesave të pronësisë mbi Kupën e Botës dhe kompeticione të tjera të FIFA-s tek investitorë privatë. Organizatat theksojnë se Kupa e Botës është një prej trashëgimive më të rëndësishme të futbollit, e ndërtuar ndër breza nga futbollistët, ekipet kombëtare dhe tifozët, dhe se nuk duhet t’i dorëzohet investitorëve privatë.
Në deklaratë kritikohet mënyra se si është hartuar dhe paraqitur propozimi, që sipas UEFA-s është bërë në fshehtësi dhe pa konsultime domethënëse me ata që kanë përgjegjësinë për administrimin dhe zhvillimin e lojës. Kjo, thonë ata, përbën një dështim të lidershipit dhe një shmangie të FIFA-s nga detyrimi i saj si kujdestare e futbollit botëror.
Federatat paralajmërojnë se tashmë po përballen me një ultimatum: të pranojnë transferimin pakthyeshëm të kompeticioneve më të rëndësishme nën kontrollin e interesave private ose të përballen me pasojat. Kjo formë qeverisjeje, vijon deklarata, është intimidim dhe presion dhe nuk mund të konsiderohet një vendim demokratik për një institucion me përgjegjësi në administrimin e futbollit.
UEFA dhe federatat shprehin gjithashtu shqetësimin për ndryshimin thelbësor që do të sjellë hyra e investitorëve: kur interesat private fitojnë pronësi, kthimi financiar bëhet detyrë qendrore dhe pritshmëritë e investitorëve shndërrohen në presion të përditshëm. Atëherë, çdo vendim për kalendarin ndërkombëtar, format e kompeticioneve dhe të ardhmen e futbollit do të udhëhiqet nga interesi i aksionarëve dhe jo nga ajo që i shërben më mirë lojës. Kjo nuk është e pranueshme, sepse interesat e federatave, ligave, klubeve, futbollistëve dhe tifozëve nuk mund të vendosen në plan të dytë përballë përfitimeve ekonomike.
Si rrjedhojë, UEFA dhe federatat e saj vendosën se asnjë përfaqësues kombëtar nga anëtaret e UEFA-s nuk do të marrë pjesë në kompeticionet e FIFA-s për sa kohë që këto propozime mbeten në fuqi, përveç nëse propozimi të tërhiqet plotësisht dhe të jepen garanci detyruese që FIFA nuk do ta hapë më kurrë qeverisjen ose kompeticionet ndaj pronësisë private. Ata deklarojnë se do t’i kundërshtojnë këto plane me vendosmëri absolute.
