Kryeministri Edi Rama u drejtua sot para anëtarëve të Partisë Socialiste për të folur mbi rrugëtimin e Shqipërisë drejt Bashkimit Europian, duke theksuar se vendi nuk ndodhet në një “rrugë të zakonshme” ku mund të ndërrohet qeveria pa pasoja për funksionimin e shtetit. Ai vuri në dukje dallimin midis demokracive të vjetra, që sipas tij kanë institucione të konsoliduara dhe një administratë të “kolauduar” me shekuj, ku ndryshimi i qeverive nuk rrëzon shtetin, dhe situatës në Shqipëri, ku ky proces është më i brishtë.
Rama shpjegoi se në vendet e konsoliduara, të cilat e kanë ngritur shtetin “dem baba dem”, mund të ndryshohet “shoferi” disa herë brenda dekadash pa devijuar rrugën e shtetit të së drejtës, duke përmendur si shembull Britaninë. Ndërsa për Shqipërinë, ai tha se vendi ndodhet në “udhëkryqin e fundit” që e lidh me rrugën për në “shtëpinë e madhe të Europës”, duke theksuar se për herë të parë dera e asaj shtëpie shihet qartë në kalendar.
Kryeministri përdori metaforën e derës së hapur për t’i shpjeguar auditorit se mundësia për integrim nuk është një dritë e paqëndrueshme që zhduket nga mjegulla, por një mundësi reale dhe e dukshme; megjithatë ai shtoi se ajo nuk qëndron e hapur pafundësisht. Nga kjo vërehej urgjenca për t’u përqendruar në vendimmarrje dhe reforma, duke paralajmëruar se Shqipëria nuk mund të “vijë vërdallë rreth udhëkryqit të fundit”.
Rama sqaroi gjithashtu se sfida aktuale nuk duhet interpretuar si një përpjekje të Partisë Socialiste për të qëndruar në pushtet, por si një angazhim të gjithë vendit për të ruajtur vendin që i takon në procesin e integrimit europian dhe për të zënë vend në “sofrën e BE”. Lidhur me këtë, ai bëri thirrje për qartësi dhe vendosmëri në momentin vendimtar që po kalon vendi.
Top Channel
