Biznesmeni shqiptar Ilir Shtufi, 53 vjeç, i arrestuar në Greqi mbi bazën e një urdhër-arresti të lëshuar nga SPAK, ka refuzuar ekstradimin drejt Shqipërisë, por Gjykata e Apelit e Selanikut ka vendosur për ekzekutimin e kërkesës së ekstradimit. Shtufi i mohoi gjatë seancës dëgjimore akuzat që rëndojnë ndaj tij dhe kundërshtoi ekstradimin, duke pretenduar se po persekutohej politikisht për shkak të aktiviteteve të tij në biznes. Ai gjithashtu shprehu shqetësime për sigurinë e tij dhe vuri në dyshim paanshmërinë e sistemit të drejtësisë në Shqipëri, sipas mediave greke.
Emri i Shtufit është pjesë e rreth 20 biznesmenëve të shpallur në kërkim nga Prokuroria e Posaçme (SPAK) në kuadër të një dosjeje të gjerë hetimore që përfshin dyshime për përfshirje në rrjete kriminale dhe pastrim të të ardhurave të përfituara nga aktivitet i paligjshëm. Autoritetet greke ndaluan Shtufin pas një operacioni ndërkombëtar të lidhur me hetime për pastrim parash dhe trafik droge.
Ai u gjet dhe u arrestua në qershor në një hotel në Selanik nga oficerë të Nëndrejtorit të Krimit të Organizuar të Greqisë Veriore, bazuar në informacione të dhëna nga INTERPOL-i. Pas arrestimit, autoritetet shqiptare nisën procedurat për ekstradimin dhe pala greke po shqyrton kërkesën në përputhje me legjislacionin Kombëtar dhe marrëveshjet ndërkombëtare të bashkëpunimit juridik.
Hetimet që përfshijnë Shtufin vazhdojnë, ndërsa autoritetet shqiptare dhe greke janë në koordinim për hapat e mëtejshëm ligjorë. Dosja e SPAK përfshin persona të dyshuar për përfshirje në rrjete kriminale dhe aktivitetet e dyshimta financiare, dhe autoritetet po vijojnë hetimet për sqarimin e përgjegjësive dhe procedimin e mundshëm të të përfshirëve. Vendimi i Gjykatës së Apelit së Selanikut për të ekzekutuar ekstradimin do të shënojë një fazë të re në procesin ligjor ndërmjet dy vendeve.
