Për herë të parë, fronti i bashkuar i Evropës kundër planit të Gianni Infantinos është thyer: presidenti i Federatës Çeke të Futbollit, David Trunda, u bë lideri i parë evropian që deklaroi hapur mbështetje për FIFA Forward Enterprise (FFE), super-planin 20 miliardë dollarësh për shitjen e të drejtave komerciale të Botërorit. Lajmi erdhi në një intervistë për Sky News, ku Trunda, që ndodhet në krye të FAČR pak më shumë se një vit, shprehu se sheh përfitime pragmatike për futbollin çek nga bashkëpunimi i ngushtë me Infantino dhe ekipin e tij, duke theksuar përvojat pozitive personale nga projektet e mëparshme me FIFA-n.
Kjo lëvizje bie në një moment të tensionuar mes FIFA-s dhe institucioneve të tjera, ndërsa UEFA dhe Concacaf janë të zemëruara ndaj propozimit. FIFA ka vendosur një ultimatum për 211 federatat anëtare: ato që pranojnë propozimin deri më 19 shtator do të përfitojnë 40 milionë dollarë, ndërsa të tjerat do të marrin vetëm pjesë shumë më të vogla nga shuma e përgjithshme. Kjo taktike presioni ka ngjallur revoltë; një zyrtar i lartë i futbollit botëror e ka cilësuar skemën si “ryshfet të pastër”.
Qëndrimi i Trundës është perceptuar si një goditje për udhëheqjen evropiane të futbollit, e cila ka kundërshtuar fuqishëm privatizimin që parashikon plani. UEFA ka cilësuar ofertën si “një vijë të kuqe që institucionet drejtuese të futbollit nuk duhet ta kalojnë kurrë”. Me Çekinë që “thau tabunë” dhe duket se ka pranuar mundësinë për të hyrë në marrëveshje që sjellin miliarda për FIFA-n, në qendër të diskutimeve ka mbetur frika e një efekti dominues: se cilat federata të tjera mund të bindën nga oferta financiare prej 40 milionë dollarësh dhe të ndjekin shembullin çek.
Lëvizja e Trundës ka prishur konsensusin evropian rreth FFE dhe ka shtuar presionin mbi federatat e tjera për të vendosur midis përfitimeve të menjëhershme financiare dhe qëndrimit të përbashkët kundër privatizimit të të drejtave të Botërorit. Top Channel.
